Біліктілікті шыңдау бағдарламасы
<p style="text-align: justify;">Өткен жылдың соңында С.Өтебаев атындағы Атырау мұнай және газ университетінде «Тotal energy school» мектебі ашылды. Енді мұнда Францияның жетекші профессорлары атыраулық студенттер мен жас ғалымдарға дәріс береді. Мақсат – тәжірибелі халықаралық сарапшылардың теориялық білімі мен практикалық дағдысын үйрену, мұнай өнеркәсібі, академиялық оралымдылық тұрғысында байланыс орнату.</p>
– Қазір жоғары білімді мамандарға қойылатын талап күшейді. Әсіресе қайта даярлау мәселесі, жаңа технологияларды меңгеру маңызды болып отыр. «Total energy school» мектебі ұйымдастыратын курстар осы мәселелерді шешуге септігін тигізеді. Бұған дейін Назарбаев Университеті мен әл-Фараби атындағы ҚазҰУ-де өткен курстар тиімділігін көрсетті. С.Өтебаев атындағы Атырау мұнай және газ университетінде екі аптада 350 адам осы курсқа қатысып, білімін жетілдіреді. Бұл жастардың ғылым-білімге деген құлшынысын арттырып, болашағына сенім мен серпін береді, – деді Энергетика министрі Нұрлан Ноғаев.
Университет ректоры Гүлзада Шакуликованың айтуынша, төмен көміртекті энергетика саласының көшбасшысы атанып отырған «Total energy school» әлемдегі ең үздік энергетикалық компаниялардың жұмысын тек теориялық тұрғыда емес, іс жүзінде зерттеуге мүмкіндік беріп отыр. «Total» профессорлар қауымдастығы бакалавриат пен магистратурада білім алатын студенттерге, профессор-оқытушылар құрамына мұнай-газ, мұнай-химия, энергетика және қоршаған орта пәндерінен курстар ұйымдастырады.
– Бұл тәжірибе студенттердің болашақта жұмысқа орналасуына даңғыл жол ашады. Дәрістерді «Total» мамандары кәсіби сараптама мен нақты іс-тәжірибедегі мысалдарды зерделеу негізінде дайындап отыр. Біз ынтымақтастықты тек мұнай-газ секторында ғана емес, болашағы зор жаңғырмалы энергия көздері саласында да жалғастыруға, бірлескен жобаларды дамытуға ниеттіміз, – деді Гүлзада Шакуликова.
Жақында аталған университетте белсенді трансформациялау аясында білім беру процесіне тағы бір үздік тәжірибе енгізілді. Бұл жолы энергетика секторын кәсіби мамандармен қамту үшін МВА бағдарламасы ашылды. Ректор Гүлзада Шакуликованың пікірінше, бұл бағдарлама тек өңірдің ғана емес, еліміздің индустриясына ұлттық кадрларды даярлауға ықпал етеді. Өйткені көшбасшы маманды тек үздіксіз кәсіби және жеке даму ғана ерекшелейді. Сол себептен МВА бағдарламасы мансабын одан әрі жоғарылатуды, сондай-ақ қоғамның дамуына үлесін қосуды көздейтін көшбасшыларға арналып отыр.
– Кез келген мемлекеттің дамуының негізі – білім мен ғылымды жетілдіру. Бұған біздің университеттегі МВА бағдарламасының қосар үлесі зор болмақ. Мұнда дәріс беретін қазақстандық және шетелдік ірі компаниялардың тәжірибелі оқытушылары мен танымал сарапшылары модульдік нысандағы жұмыстан қол үзбей оқытуды, шетелдік тағылымдаманы, коммуникациялық мүмкіндікті кеңейтуді көздейді, – деді Г.Шакуликова.
Атырау облысы