Полицейлер жанашырлығы

Шынында да, үлкенге ізет көрсетіп жүрген жаяу патруль­дегі погонды кім екен деп, Өске­мен қалалық полиция бөлімінен сұрастырғанбыз. Жалпы қалада жаяу патрульде 34 қыз­меткер, 6 учаскелік полиция бекеті бар екен. Сақшылар өздеріне бекі­тіл­­ген әкімшілік аумақта тәртіпті қа­да­ға­лайды, қылмыстың алдын алады. Соны­мен қатар 102 арнасына түскен шақыр­тулар бойынша да қызмет көрсетеді. Демек, тәртіпсіздік, ұрлық, атыс-ша­быс орын алған жағдайда, алып-ұшып алдымен жететін де па­труль­дік полицейлер.  

Солардың бірі – қарияға қол­ға­быс етемін деп, көпшіліктің көзіне түс­кен  Санат Әміренов. Өс­ке­меннің тай­ғақ көшесінде ақ жаулықты ананы қолтығынан демеп, тұрғындардың жанары­на жылы ұшыраған полицейдің пікірінше, бұл – кез келген адам­ның парызы. Солай ғой, бірақ біз­дің қоғамда погондылардың көшеде көмек көрсетуі көзге ерек­ше жылы көрінеді. Әрине, аза­маттарға қауіп төнсе, тәртіпсіздік орын алса, құқық қорғау қызмет­кер­леріне жүгіну әдеттегі жағдай. Ал Са­наттай қолғабыс етіп, ал­ғыс арқа­лағандар санаулы десем, өтірік емес.

– Біздің қарамағымыздағы әкім­шілік аумақ – тоғыз жол­дың торабында. Ерсілі-қарсы­лы ағылып жатқан көлік көп. Әлеу­меттік желіде тарап кеткен сурет есімде. Ол күні жұмысқа таңертең кел­дік. Күн аяз. Қарасам, жол жие­гінде ауыр сөмке көтерген апа тұр екен. Сөмкесін алып, жол­дың арғы шетіне өткізіп жібердім. Бойында тәрбиесі бар кез келген азамат үлкенге ізет көрсетеді, – дейді патрульдік полицей Санат Әміренов.

Ұлан ауданы, Бозанбай ауы­лы­ның тумасы Санат Әміренов – қазақы мәдениетті, салт-сананы бойына сіңі­ріп өскен азамат. Волейболдағы жат­тықтырушысы да тәртіп әркімнің өзі­нен баста­латындығын айтып отырады.

Әлбетте, формадағы қызмет­кер – мем­­лекеттің айнасы іспетті. Сон­дық­тан да ортақ тәртіпке бағы­нып, қыз­­мет­ке адал болып, жан-жағына жақ­сы­­лы­ғы­мен танылса, құқық қорғау са­ла­сы­ның се­ні­мін ақтағаны, абыройын ас­қақ­­тат­қаны.

Соңғы жылдары полицейлер­дің ел арасынан табылып, көмек көрсетулері жақсы үрдіске айнал­ған. Жуырда қар қалың түскен күні  Өскеменнің поли­цей­лері қызметтік формасын жұмыс киі­мі­не ауыстырып, «Негізгі орта мек­теп-интернаты» мекемесінің аула­сын қар­дан  тазалады.

– Қаланы қар басқан күні біз­дің қыз­меткерлер қолға кү­рек алып, мектеп ауласының қа­рын күреді. Сенбілік көңілді өтті. Ең бастысы, қоғамға пай­да­­мыз тиіп жатқанына қуан­дық, – дейді об­лыстық Поли­ция депар­таментінің жеке қимыл­дайтын арнайы жасақ ко­мандирі Айдар Нұр­мұхамбетов.

Ойламаған жерден ауласы айна­дай болған мектеп директоры Анар Жеті­бае­ва да оқушылар мен мұғалімдер аты­­нан тәртіп сақшыларына алғыс біл­дірді.

– Интернат аумағында балаларды қойып, ересектердің жүруі мүмкін бол­­май қалды. Қуа­нышымызға орай, поли­ция қызметкерлері көмекке келді. Әйтпегенде, балалар ойын ала­ңына жақындай алмаушы еді, – дейді мектеп директоры.

Мұндай жақсылық жасау жариялана бермегенімен, аудандарда да дәстүрге айналған. Ауылдық жерлердегі полицейлер жұмыстан бос уақыттарында жал­ғызбастыларға, қарттарға көмек көр­сетіп тұрады.

Шығыс Қазақстан облысы