Балықтар жаппай қырылды
<p style="text-align: justify;">Таяуда Экология, геология және табиғи ресурстар министрлігі Балық шаруашылығы комитетінің Тобыл-Торғай облысаралық бассейндік балық шаруашылығы инспекция­сына Ақтөбе өңіріндегі Жарсай ауылының Кузьмин тоғанында балықтардың жаппай қырылғаны туралы хабарлама түскен еді.</p>
Бұл хабарлама түскен бойда инспекция мамандары Ветеринарлық бақылау және қадағалау комитетінің Ақтөбе облысындағы аумақтық инспекциясы және облыстық табиғи ресурстар басқармасымен бірлесіп, аталған су айдынына тексеру жүргізді.
Жиналған өлі балықтардың саны 4 тоннаны құрады. Оны жою бойынша тиісті жұмыстар ұйымдастырылып, зертханалық зерттеу жүргізуге су мен балықтан сынама алынды. Алдын ала жасалған болжамға сәйкес, балықтардың қырылуына су деңгейінің жеткіліксіздігі (1,0-1,5 м) салдарынан судағы оттегінің тапшылығы себеп болуы мүмкін. Нақты себебі тиісті зертханалық зерттеу жүргізілгеннен кейін қосымша хабарланады.
Кузьмин тоғаны Ақтөбе қаласынан 140 шақырым қашықтықта Қобда ауданының Жарсай ауылдық округінде орналасқан. Тоғанның ауданы 3 гектарға жуық. Нысан балық шаруашылығы су айдындарының тізіміне енбеген. Тоған малды суаруға арналғандықтан су қоймасының жанында өндірістік нысандар жоқ.