Тиісті жұмыстар жүргізілуде
<p style="text-align: justify;">Осы жылы 27 сәуір күні республикалық Egemen Qazaqstan газетінде аталған басылымның Жамбыл облысы бойынша меншікті тілшісі Хамит Есаманның «Жері – қазақтікі, жарығы – қырғыздікі» атты мақаласы жарық көрген болатын. Аталған мақалаға байланысты Меркі ауданы әкімдігі тарапынан дайындалған жауапты жолдаймын.</p>
Меркі ауданы Кеңес ауылдық округіне қарасты Жауғаш батыр ауылында жалпы 89 адам тұрады. Мұнда 23 түтін бар. Аталған ауыл аудан орталығынан 80 шақырым жерде орналасқан. Қазіргі таңда Жауғаш батыр ауылы көрші Қырғыз мемлекетінен электр қуатын алуда. Осыған орай, аудан әкімдігі тарапынан өткен жылы жобалық-сметалық құжаттама әзірлеу мақсатында техникалық шарт алынып және жобалау-іздестіру жұмыстары әзірленді. Техникалық шартқа сәйкес, қосылу нүктесі Блоговещенко ауылында орналасқан қосалқы стансасынан берілген. Сонымен қатар аталған елдімекенге және «Қаратау» әскери бөлімшесіне орнатылатын трансформаторларға мемлекеттік акті әзірленді.
Бүгінде Жамбыл облысы әкімдігінің мемлекеттік сатып алу басқармасы тарапынан мемлекеттік сатып алу конкурсы өткізіліп, нәтижесі бойынша жобалаушы мекеме болып 15134,922 теңгеге «Корпорация «Асыл-Строй» жауапкершілігі шектеулі серіктестігі анықталды. Қазіргі таңда жобалаушы мекеме тарапынан топографикалық түсірілім жасау жұмыстары жүргізілуде. Жоба әзірленіп, сараптама қорытындысы алынғаннан кейін, белгіленген тәртіппен бюджеттен қаражат қаралып, құрылыс монтаждау жұмыстары жүргізілетін болады.
Берік БЕГАЛИЕВ,
Меркі ауданы әкімінің орынбасары