Жүлделі орындар үшін таласатын командалар анықталды
<p style="text-align: justify;">Шайбалы хоккейден Латвияда өтіп жатқан әлем чемпионатының жартылай финалына жолдама алған командалар анықталды, деп хабарлайды <a href="https://egemen.kz/">Egemen.kz.</a></p>
Ширек финалдық сайыста АҚШ құрамасы Словакияның тас-талқанын шығарды. Есеп – 6:1. Бұл матчта Колин Блэквелл мен Конор Гарланд дубль авторы атанса, Брайан Бойл мен Александр Хмелевски бір-бір голдан соқты. Словакиялықтар қатарынан Петер Цегларик қана шайбаны торда тулата алды.
Финляндия мен Чехия арасындағы бәсекенің тағдырын екінші кезеңде Суоми елінің сұрмергені Йере Иннала соққан жалғыз гол шешті – 1:0.
Германия мен Швейцария арасындағы кездесуде жеңімпаз команда буллит соғу барысында анықталды. Бұл ретте немістердің бағы жанды – 3:2. Канаданың хоккейшілері Ресей құрамасын овертаймда ұтты – 2:1.
Жартылай финалдық бәсекелер 5 маусымда өтеді. Бұл кездесулерде АҚШ пен Канада және Финляндия мен Германия күш сынасады.