Спортшы балаларға базарлық
<p style="text-align: justify;">Кеншілер астанасындағы «Таңшолпан» балалар үйі спорт саласындағы жетістіктерімен лайықты түрде мақтана алады. Нақты айтар болсақ, аталған мекеменің тәрбиеленушілері футбол және велоспорттан Еуропа елдерінде өткен жарыстарда үздік нәтижелерге талай мәрте қол жеткізген.</p>
Таяуда, саламатты өмір салтын насихаттау және спорт арқылы жаңа буынды тәрбиелеу ісімен айналысып жүрген «Батыр боламын» атты қайырымдылық қоры балалар үйіне бокс пен күреске арналған құрал-жабдықтарды сыйға тартты. Енді тәрбиеленушілер спорттың осы түрлерімен де тұрақты айналысуға мүмкіндік алды.
«Таңшолпан» балалар үйі директорының орынбасары Гүлмира Майкамбева қуанышымен былайша бөлісті:
– Қайырымды жандар бізге бокс тұлыбы мен былғары қолғаптар, шлемдер, басқа да спорттық снарядтарды сыйға тартты. Осының арқасында біз жаттығу залын қайта бейіндедік. Енді балалардың бокс және күреспен айналысуына көбірек мүмкіндіктері бар. Өте қуаныштымыз және «Батыр боламын» қорына айтар алғысымыз шексіз!
Айта кету керек, «Таңшолпан» балалар үйінің командалары футбол, велоспорт және үстел теннисінен Қазақстанның да бірнеше мәрте чемпиондары атанған.