Жаңалықты жатырқамау керек

Бизнес субъектілерінің нысандарына орнатылған Ashyq платформасы жаман тұмаудың таралу қаупін азайтудың бірден-бір тиімді жолы екені белгілі. Облыс бойынша жобаға қатысу үшін жүздеген өтінім түсіп, оның басым бөлігі ресми рәсімделіп, кәсіпкерлерге QR-код берілген.

– Бүгінде облыс орталығында 151 субъекті Ashyq платформа­сы арқылы жұмыс істеп тұр, – дейді Көкшетау қалалық кә­сіп­­керлік бөлімінің басшысы Андрей Подгурский, – алғашқы бетте кә­сіп­керлер тарапынан түсініс­пеу­шіліктің болғаны рас. Жаңа­лық­қа жатырқай қарай­тын­дар табылады ғой. Біз олардың басын қосып, не үшін қажет екендігін түсіндірдік. Алдымен халықтың денсаулығын сақтау, дауасыз дерттің алдын алу қажет. Екінші жағынан халыққа қызмет көрсету деңгейі кемімейді. Кә­сіп­керлер жаңалықтың жай-жапсарын жақсы түсінгеннен кейін өтінімдерін бере бастады.

Бөлім басшысының айтуына қарағанда, Ashyq платформасы арқылы жұмыс істейтін нысандардың жартысынан астамы – қоғамдық тамақтандыру орын­дары. Жаңалықтың жай-жапсарын, тиімділігін кәсіп­керлер де айтып отыр.

– Дауасыз дерттің дабылы жет­кеннен бері біздің салада жұ­мыс істейтін кәсіпкерлерге оңай болған жоқ, – дейді облыс орталығындағы «Бархат» дәм­ха­насының иесі Айсұлу Бажа­қова, – әрқайсымыздың төлей­тін несиелеріміз бар. Жұмы­сы­мыз тоқтап, шаруамыз қо­жы­­рап кетті. Тығырықтан шы­ғар жолдың бірі осы жаңалық екенін жете түсініп отырмыз. Бір айта кетерлігі, қоғамдық тамақ­тан­дыру орындарының жұмыс істеуіне ғана емес, өңірдегі дертке тосқауыл қоюға септігі зор. Түйін­дей айтқанда, екі жаққа да тиімді.

Облыс орталығындағы бір­қа­тар компьютерлік клуб, шаштараз, монша тәрізді қоғам­дық орындар осы платформа арқылы жұ­мыс істеуде.

– Біздің нысанға да платформа орнатылды, – дейді «Зевс» ком­пью­т­ерлік клубының директоры Олжас Шаймұрат, – қазір алаң­сыз жұмыс істеудеміз. Хал­қы­мызда «сақтансаң сау боласың» дейтұғын қанатты сөз бар ғой. Клубқа келушілер жазатайым індет жұқтырып алса, қаншама қиындықты басынан кешірер еді. Енді міне, жағымды жаңалықтың нәтижесінде қауіп-қатердің алдын алып отырмыз. Өз басым платформаның тиім­д­ілігі аурудың алдын алу деп есептеймін. Шынында да бұл –дерт жұқтырмаудың бірден-бір жолы. Алдағы уақытта цифрлы платформа әр кәсіпкердің сенімді көмекшісі болуы әбден мүмкін.

Ashyq платформасы орна­тыл­­маған нысандар шектеулі уақытта ғана жұмыс істейді. Атал­ған қосымша жалпы базамен бі­рік­тірілгендіктен, барлық дерек мөлдіреп көрініп тұр. Заманауи технологияның жетістігін өңірдегі кәсіпкерлер кәдеге жаратуға әб­ден құлықты. Кәсібін жаңа бас­та­ғандар да бірден өтінімдерін беріп, тіркелуге асығуда.

Сөз арасында платформаның тиімді екенін дәлелдейтін бір мыс­алды сыналап келтіре кете­йік. Осы жаңалық арқылы облыс орталығында қоғамдық тамақ­тандыру орындарында «қы­зыл» және «сары мәртебесі» бар 12 келуші анықталып, оның төртеуінде ПТР тестінің оң нәтижесі және 8-і қауіпті індетті тасымалдаушы­лар екені анықталған. Мысалы, Көкшетаудағы FamilyMood IPARTMOOD мейрамханасы мен «Мя­со­рубка» нысандары сияқты қоғам­дық тамақтану орындарында «қызыл мәртебесімен» бірнеше адамның келгені анықталған. Мұндай оқиға Щучинск қала­сын­дағы «Ягуар» фитнес-орталығы мен Бурабай кентіндегі «Достар» дәмханасында да орын алған. Осы бір мысалдан-ақ қауіптің сейілмей тұрғандығын, адамдардың әлі де бейқам екендігін, жаңалықтың пайдасын аңғаруға болады.