Дипломаттар Жоғарғы сотта пікір алмасты

Басқосуға АҚШ, Түркия, Қытай, Италия, Нидерланд, Франция, Мысыр, Беларусь, Финляндия, Грузия, Украина, Куба, Словакия, Вьетнам, Индонезия, БАӘ, Болгария, Израиль секілді елдер­дің елшілері мен елшілердің орынбасар­лары қатысып, Қазақстанның сот жүйе­сіндегі реформалардың нәтижелері туралы мәліметтермен танысты.

Брифингте сөз сөйлеген Жоғарғы сот­тың төрағасы Жақып Асанов еліміз­де қолға алынған сот реформасы, сот­тар­дың тәуелсіздігі мәселесі, сыбайлас жемқорлыққа қарсы шаралар, сот төре­лігінің сапасы туралы баяндады.

Іс-шара барысында Қазақстанның әлемдік рейтингтерде «судьялық» көр­сеткіштер бойынша өз орнын жақсарт­қаны айтылды. Өткен жылғы тәуел­сіз зерттеулерге сәйкес, Дүние­жү­зі­лік банк­тің жобасы бойынша ха­лық­тың 53 па­йызы соттарға сенеті­нін біл­дір­се, сот­тардың қызметін пай­да­ланушы­лар­дың 67 пайызы олардың жұмысын оң бағалаған.

Кездесуде Палестина елшісі Мун­тасер Абу Зейд, Германия елшісі Тило Йоханнес Клиннер Қазақстандағы инвесторлармен арадағы дауларды ше­шу жолдары туралы ойларын ортаға салса, «Астана» Халықаралық қаржы ор­талығы сотының тіркеушісі Кристофер Холт соңғы 4 жылдың ішінде 400-ден астам істің сәтті шешілгенін атап өтті. Ол бұл нәтижені «сот пен орталық үшін бұрын-соңды болмаған көрсеткіш» деп санайтынын да ашық мәлімдеді.

Ал Қазақстанның сот жүйесін бұрынғы кеңестік елдердің ішіндегі ең үздіктердің бірі деп санайтын «Бей­кер және Макензи» қазақстандық кең­­се­сінің директоры Куртис Мас­терс реформалардың ішінде цифр­лан­ды­рудың даму деңгейін ерекше атап өтті. Ауғанстанның уақытша сенім­ді өкілі Азизулла Омардың сот ше­шімдерін орындаудың және сенім­ді қарым-қатынасты қалпына кел­тірудің маңыздылығына тоқтала келіп, медиатор­лар жұмыс істейтін ғима­раттың судьялардың кабинеттеріне қара­ғанда заманауи екенін де тілге тиек етті.

Жиын барысында дипломаттардың түрлі өзекті сұрақтарына жан-жақты жауап берген Жоғарғы сот төрағасы «Ең басты мәселе – проблемаларды қа­лай жеңуге болатынын нақты көре білу, кәсіби команда, Президенттің ерік-жі­гері, әлемдік стандарттар бойынша жұмыс істеу» деп атап өтті.

Алғаш рет ұйымдастырылып отыр­ған брифинг соңында дипломаттар сот реформасына қатысты сауалдамаға жауап беріп, осындай басқосуды өткі­зуді дәстүрге айналдыруды ұсынды.