«Аманат» байқауының жеңімпаздары

Жеңімпаздарды жеңістерімен және кәсіби мерекелерімен құттықтаған Сенат Төрағасы Мәулен Әшімбаев пан­демия кезінде журналистер мен басқа да БАҚ қызметкерінің рөлі аса ма­ңызды болғанын атап өтті. Олар­дың қа­жырлы еңбегінің арқасын­да қазақ­стандықтар елдегі ахуалды, індетпен күрес бары­сында қолға алын­ған шара­ларды, мем­лекеттің дамуы жо­лында қабыл­данып жатқан аса маңыз­ды заңдарды дер кезін­де біліп отырды.

«Пандемияға және қабылданған шектеулерге байланысты биыл екінші жыл қатарынан журналистер қиын жағдайда жұмыс істеуде. Соған қарамастан, сіз­дер кәсіби біліктіліктің биігінен көрі­ніп, азаматтарымызды маңызды ақпарат­тармен дер кезінде таныстырып, өзекті мәсе­лелерге арналған репортаждар мен сарап­тамалық материалдарыңызды уақты­лы жариялап келесіздер. Осындай белсен­діліктеріңіз үшін сіздерге алғысымызды білдіреміз», деді Сенат Төрағасы.

М.Әшімбаев Мемлекет басшысы Қазақ радиосының 100 жыл­дығына орай 1 қазанды ресми түрде «Радио қызмет­керлерінің күні» ретінде жариялауды ұсынғанын айтты.

Биыл байқауға 100-ге жуық жұмыс келіп түсті. Қатысушылар арасында те­­­ле­арна, радио, газет, ақпараттық портал­­дар және басқа да БАҚ тілшілері бар.

«Байқауға ұсынылған барлық материал – жоғары кәсіби деңгейдегі жұмыстар. Арнайы комиссия олардың арасынан ең үздіктерін іріктеп алды. Бар­лық жеңімпазды бүгінгі жеңістері­мен құттықтаймын», деді М.Әшім­баев.

Сондай-ақ Сенат Төрағасы биыл бай­қауға белгілі қазақстандық журналис­тер Нұртілеу Иманғалиұлы мен Ми­хаил Дорофеев атындағы екі жүлде қо­сыл­ғанына назар аударды.

«Нұртілеу Иманғалиұлы мен Ми­хаил Дорофеев – отандық журналис­тиканың дамуына үлкен үлес қосқан қаламгерлер еді. Олар талантты журналист қана емес елі­міздің нағыз патриоттары болды. Нұр­тілеу аға мен Михаил Дорофеевтің жар­қын бейнелері әрқашан біздің жады­мызда сақталады. Олардың еңбекке де­ген адалдығы, кәсіби шеберлігі мен мол тәжірибесі жас журналистер үшін әрда­йым үлгі-өнеге болып қала беретіні сөз­сіз. Сенат тағайындаған арнайы жүлделер осы бағытқа да өз ықпалын тигізеді деп сенеміз», деді М.Әшімбаев.

«Аманат» байқауының биылғы жеңімпаздары мыналар:

Үздік телевизиялық материал – Ин­дира Жылқайдарова («Хабар» телеарнасы) және Светлана Пенькова («Первый канал «Евразия»);

Үздік радиоматериал – Дулат Әбибуллаев («Qazaq radiosy»);

БАҚ басылымдарындағы үздік жарияланым – «Атырау» газетінің ұжымы және Оксана Скибан («Литер» газеті);

Интернет-басылымдағы үздік жарияланым – Марлан Жиембай («Қаз­Ақпарат» ХАА) және Евгений Федотов (Kazpravda.kz);

Әлеуметтік желілердегі үздік жарияланым – Нартай Аралбайұлы;

«Тәуелсіздікке 30 жыл» – Қазақ­станның Тәуел­сіздігінің 30 жылдығы туралы үздік материал – Жолдыбай Базаров («Еgemen Qazaqstan» газеті) және «Хабар 24» телеарнасының ұжымы;

Нұртілеу Иманғалиұлын есте қал­дыруға арналған «Қазақ журналис­ти­касының дамуына қосқан үлесі үшін» сыйлығы – Жайна Сламбек («Qazaqstan» ұлттық телеарнасы);

Михаил Дорофеевті есте қалдыруға арналған «Үздік аналитикалық материал үшін» сыйлығы – Юрий Масанов (Kursiv.kz);

Парламенттік журналистиканың дамытуға қосқан үлесі үшін арнайы жүлде – Эльдар Нуруллин («Экс­пресс-К» жаңалықтар порталы).