Байқоңырдан «Протон-М» зымыраны ұшырылады
<p style="text-align: justify;">Мемлекеттік комиссия Халықаралық ғарыш стансасына «Наука» жаңа зертханалық модулін ұшыру мерзімін белгіледі, деп хабарлайды <a href="/" target="_blank" rel="noopener noreferrer">Egemen.kz</a>.</p>
Байқоңыр ғарыш айлағының № 200 ұшыру алаңынан бортында «Наука» модулі бар «Протон-М» зымыран-тасығышының старты 2021 жылғы 21 шілдеде, жергілікті уақыт бойынша сағат 17:58-ге (Нұр-Сұлтан уақытымен сағат 20:58:21) белгіленген. Ұшырудың резерв уақыты - 22 және 23 шілде.
Бастапқыда ұшыру 15 шілдеге белгіленген, алайда ұшар алдындағы жұмыстардан кейін «Наука» модулі монтаждау-сынау корпусына қайтарылып, ұшыру бір аптаға кейін қалдырылды.
Ресейлік ақпарат құралдары ұсынған мәліметке сүйенсек, ұшыруды кейінге қалдыру себебі - мамандардың құрастыру кезінде жұлдыз сенсорларын экран-вакуумды жылу оқшаулағышпен жабуды ұмытып кетуінде.
«Наука» модулінің ХҒС-қа ұшуы 8 тәулікке созылады, оның «Звезда» қызметтік модуліне қосылуы 29 шілдеге белгіленген.
«Наука» зертханалық модулі пайдалануға берілгеннен соң, ХҒС-тың ресейлік сегменті қосымша жұмыс орны мен жүк сақтау, су мен оттегіні регенерациялайтын аппаратура орналасатын орынды иеленеді. Яғни ғарышкерлердің жағдайы жақсарып, ХҒС экипажының қауіпсіздігі күшейе түседі.