Ел үміті ақталса игі

Сайлау учаскесі ауылдағы ауыл шаруашылығы колледжінің ғимаратына орналасқан. Бірінші қабаттағы кең де жарық, ке­лім­ді-кетімді кісілердің дауыс бе­руі­не қолайлы бөлмеде сай­­лау комиссиясының төр­аға­сы Нұрлан Кәрімовты жолық­тыр­дық. Сағат онға дейін 646 сай­лау­шының 59-ы дауыс беріп­ті.   

– Сайлаушылардың белсен­ді­лігі төмен емес пе? – деп сұра­дық біз.

– Ауыл адамдары малдарын жайлап, қойын қосып, сиырын сауып бір-ақ келеді, – деді сайлау комиссиясының төрағасы.

Учаскеде 95 жастағы Генна­дий Малахов есімді қарт адамды жолықтырдық.

– Ел Президентінің осы бас­та­масы көңілге қонымды, – дей­ді Геннадий Иванович. – Кеңес заманында совхоз-техникум болып тұрған кезімізде жұмыссыз жүр­ген бір адамды таба алмау­шы едік, қазір жастардың кө­бі қол қусырып қарап отыр. Жұ­­мыс­сыздықтың әсерінен келең­сіз оқиғалар да болып жатады. Ел сайлаған әкім алдымен осы мәселеге көңіл бөлсе дер едім.

Сайлау учаскесіне тіркелген 24 адам денсаулықтарына байланысты үйлерінде дауыс бер­мекші. Расында да сай­лау­шы­лар легі сағат оннан аса кө­бейе бастады.  Солардың бірі – Марат Омаровтың айтуына қарағанда, округтегі ең басты мәселе – жа­йы­лым мен шабындық.  Төрт тү­­лік­тің сүмесімен күн көріп отыр­­ған халыққа осындай тү­йін­ді мәселелердің шешілгені керек.

№506 сайлау комиссиясы ауылдағы орта мектепке орналасыпты. Мұнда 692 сайлаушы тіркелген, 7 адам үйінде дауыс береді. Сағат оннан аса елу адамның дауыс бергендігі белгілі болды.

–Біздің сайлаушыларымыз алыста тұрады. Мәселен, өзеннің арғы бетіндегі Нұрлы­көш үш шақырым жерде, Совет көшесінің шетіндегі аумақ та осы учаскеге тіркелген. Ол үй­­лер де біршама қашықта. Сай­­лау­шылар сондықтан бөге­ліп жатқан болуы мүмкін, – дей­­ді сайлау комиссиясының төр­ағасы Булат Бимағамбетов. – Ха­лықтың бәрі күні бұрын құ­лақтандырылған.

Мұндағы сайлаушылармен де жүздесіп, ауылдағы ше­ші­мін таппаған өткір мәсе­ле­лер туралы сұрап білдік. Осы округ тұрғыны Шайзада Нұрболаттың айтуынша, тұр­ғын­дарды жер және жол мәселе­сі толғандырады. Халқы қалап сайлаған округтің жаңа әкімі осы мәселелерді оңынан шешіп берсе, ауылдың айдарынан жел есері анық.   

Жұрт өздері сайлаған әкім­нің жауапкершілікпен жұмыс істейтіндігіне сенімді. Жалғыз Шағалалы ауылында ғана емес, облыстың 95 сайлау округіне 318 кандидат ұсынылып, үміт оты лаулап тұр.

Облыстағы сайлау учас­келерінде 436 байқаушы жұмыс іс­теуде. Байқаушылардың об­лыс­тық штабының жетекшісі Ер­лан Закирьяновтың айтуынша, сағат 11-ге дейін 20385 сайлау­шы дауыс беріп үлгерген. Бұл барлық сайлаушылардың 20,12 пайызы.

– Біз әрбір сағат сайын бай­қау­шылардан ақпарат алып отыр­мыз. Тұтастай алған­да, нау­қан заң шеңберінде өткі­зілуде, – дейді Ерлан Закирьянов.

Тұңғыш рет ұйым­дасты­рыл­ған саяси науқаннан жұрт үл­кен үміт күтіп отыр. Өздері сай­лаған әкімдер жергілікті жер­лердің ұзақ уақыттан бері қордаланып қалған мәселе­лерін шешіп берсе, ел бесігі – ауылдың ажары кі­ріп қалмақ. Ел үміті ақталса игі.

Ақмола облысы