Екінші кезеңнің ерекшелігі неде?

Президенттік жастар кадр­лық резервінің ұлттық комис­сиясы бекіткен жоспарға сәй­кес ­екінші кезең резервтерін ірік­теу 1 қыркүйектен басталып, ниет білдірген жастардан құ­жат­тар қабылдау айдың ая­ғына дейін жалғасады. Құжат­тар­ды қабылдау және әлеу­етті резервшілерді іріктеу ма­ман­дандырылған онлайн платфор­мада жүргізіледі. Іріктеу нәти­жесінде мемлекеттік сектор үшін 50 жас резервші таңдап алынбақ.

Брифинг барысында агентттік басшысы кандидаттарға қойы­латын негізгі талаптардың өз­геріссіз қалғанын айтып өтті.

«Кандидаттарға қойылатын негізгі талаптар бұрынғыдай. Яғни кадр резервіне үміткерлер Қазақстан азаматы болуы тиіс, жасы 35-тен аспауы керек, жоғары білімі бар және еңбек өті­лі 5 жылдан кем болмауы қажет. Бұл жолғы үміткерлердің білімі мен дағдыдан бөлек, қоғамдағы мәсе­ле­лерден хабардар болып, оны шешуге қызы­ғушылық танытуы жоғары баға­ланады», деген спикер ірік­теу кезінде кан­ди­дат­тарға қосым­ша арнайы тап­сырмалар бері­ліп, сол арқылы олар­дың бі­лім-біліктілігі жаңаша бағала­на­тынын  хабарлады. Бұл жолғы ірік­теудің алдыңғысынан басты айырмашылығы да – осында. Ірік­теу кезеңдерінде канди­дат­тардың шынайы уәждері мен олардың құндылық бағдарларын бағалауға басымдық беріледі.

Спикер іріктеу барысында үміт­керлердің күрделі мәтіндік, сандық ақпаратпен жұмыс істеу қабілеті, ахуалдық есептер тү­рін­де жасалған нақты мәсе­лелерді шешу біліктілігі сарапқа салынатынын атап өтті.

«Бұдан бөлек, канди­дат­тар­дың ассесмент орталық арқы­лы стратегиялық ойлау, проак­тив­тілік, қызметті басқару, ко­ман­да­лық көшбасшылық, сенім­ділік сияқ­­ты жаңа формациядағы көш­­бас­­шыларға тән құзыреттері анық­­талып, бағаланады», деп атап өтті агенттік бас­шы­сы.

Сонымен қатар Президент та­ғай­ындаған лауазым иелері, саяси мемлекеттік қызметшілер, әкімшілік мемлекеттік қызмет­шілер, «А» корпусы және Пре­зи­­денттік жастар кадрлық резер­віндегі адамдар іріктеуге қаты­са алмайды. Президенттік резерв­тен әртүрлі мемлекеттік лауазым­дарға, әкімшілік лауазым­дарға, «А» корпусына және «Б» кор­пусының басшы лауа­зым­дарына тағайындау қарас­тырылған.

А.Жайылғанованың хабарлауынша, іріктеуден өткендер Президенттік жастар кадрлық резервінде 3 жылға дейін бола алады. Сонымен қатар іріктеуден өткен мамандар мемлекеттік қыз­метке заң аясында сайланады, немесе тағайындалады. «Егер кез келген мемлекеттік қызметке жастар кадрлық резервінде жоқ маманның кандитатурасы келіп тұрса, ол қызметке жастар кадр­лық резервіндегі маманды та­ға­йындау міндетті емес», деді ол.

Биылғы іріктеуге енгізілген жаңа талаптың тағы бірі – Пре­зиденттік жастар кадр­лық резер­віне үміткерлер мем­ле­кеттік тілді білуі керек. Сол себепті де екін­ші іріктеу кезең­інде олар­дан қазақ тілін білу дең­гейін рас­тайтын құжат талап етіледі. Ірік­теуге енгізілген бұл жаңа­шыл­дық жөнінде Президент жанын­дағы Мемлекеттік басқару акаде­мия­сының ректоры Ерлан Әбіл жан-жақты түсіндіріп өтті.

«Qaztest офлайн форматта өтуді қажет етсе, Qazaq Resmi Test-ті үміткерлер өздеріне ың­ғай­лы уақытта онлайн тапсыра ала­ды. Ол үшін веб-камерасы, мик­ро­фоны және интернеті бар ко­мпьютер болуы керек. Үміткер­лер мемлекеттік басқару акаде­мия­сында Qazaq Resmi Test-ті тап­сыруға бағытталған арнайы дайындық курсынан да өте алады», деді  Е.Әбіл.

Бүгінде Президенттік жастар кадрлық резервіне мүше 300 жастың 184-і жауапты қызметке ор­наласқан. Резервшілердің қал­­ған­дары бизнес саласында, ква­зимемлекеттік секторда жұ­мыс істейді.