Ауғандағы ағайын назардан тыс қалмайды
<p style="text-align: justify;">Қазақстан Президенті Қасым-Жомарт Тоқаевтың тапсырмасымен кеше сағат 17:00-де ӘӘК С-295 әске­ри-көлік ұшағы Алма­тыға сәтті қонды. Оның ішін­де Ауғанстаннан эва­куа­ция­ланған 42 азамат бар. Бұл туралы Қорғаныс министр­лігінің ресми сайтында хабарланды.</p>
Ведомствоның мәліметінше, елімізге 42 жолаушы келген, оның ішінде 15 ересек адам және 10 бала, сондай-ақ Қазақстан елшілігінің қызметкерлері бар. Одан басқа, осы бортпен Қырғызстанның өтініші бойынша Қырғыз Республикасының 14 азаматы эвакуацияланды. Гуманитарлық операция ретінде осы ұшақпен Қазақстан елшілігіне көмек сұрап жүгінген 1 Ресей азаматы мен 1 Литва азаматы Ауғанстан Ислам Республикасынан шығарылды. «Қазақстан Республикасы әрдайым шетелдегі өз азаматтарының мүдделері мен құқықтарын қорғайды», делінген хабарламада.
Сондай-ақ Қазақстан Президенті Сыртқы істер министрлігіне Ауғанстандағы қазақтардың қауіпсіздігін қамтамасыз етуді және қажет болған жағдайда тарихи Отанына қайтару мәселесі бойынша барынша көмек көрсетуді тапсырды. Бұл туралы Сыртқы істер министрлігінің ресми өкілі Айбек Смадияров мәлімдеді.
«Ауғанстандағы этностық қазақтардың өтінішіне байланысты Мемлекет басшысы Қасым-Жомарт Тоқаев Сыртқы істер министрлігіне олардың қауіпсіздігін қамтамасыз етуді және қажет болған жағдайда тарихи Отанына қайтару мәселесі бойынша барынша көмек көрсетуді тапсырды», деді А.Смадияров арнайы брифингте.
Қазіргі кезде Ауғанстандағы елшілікке тиісті тапсырма берілді. Осы орайда Сыртқы істер министрлігінің ресми өкілі ауған жерінде мыңдаған қазақ бар деген ақпаратты жоққа шығарды.
«Бізде бар мәліметтерге сәйкес, Ауғанстан аумағында 15-ке жуық этностық қазақ отбасы тұрады – шамамен 200 адам. Ал кейбір қазақстандық бұқаралық ақпарат құралдары ауған жерінде бірнеше мың қазақтың тұратыны туралы тексерілмеген ақпарат таратты. Бұл шындыққа сәйкес келмейді. Осыған байланысты ақпаратты мұқият тексеріп отыруды және халықты дүрліктірмеуді сұраймыз», деді А.Смадияров.
Оның айтуынша, соңғы кезде елшілікке өздерін «қазақпыз» деп таныстыратын түрлі топтар жиі келе бастаған. Бірақ іс жүзінде ешқандай дәлелі жоқ.
«Олардың кейбіреуі қазақша білмейді. Ата-бабаларының Ауғанстан аумағына қоныс аудару тарихы мен ру-тайпалық байланыстары туралы да айта алмайды. Біз этностық қазақтардың тарихи Отанына оралуына көмек көрсету туралы өтініштерге мұқият тексеріс жүргіземіз», дейді министрліктің ресми өкілі.