Астанадан Қостанайға аттанды
<p style="text-align: justify;">Биыл ұлы ағартушының туғанына 180 жыл болды, соған орай кеше «Ыбырайдың ізімен» велошеруінің Нұр-Сұлтан − Қостанай бағытын бетке алған қатысушылары бас қаладағы Ыбырай Алтынсарин көшесінің бойында ұстазға орнатылған тақтатас жанынан аттанды.</p>
Бұл веломарафон Тәуелсіздігіміздің отыз жылдығы мен Ыбырай атамыздың айтулы мерейтойына арналды.
Велотоп бес адамнан тұрады. Олардың бәрі де әуесқой велошабандоздар. Мамандықтары да әртүрлі: мұғалім, журналист, зейнеткер. Игілікті жобаның бастамашысы – Ернат Мелсұлы, ағылшын тілінің маманы және «Хабар 24» телеарнасындағы шетел хабарларының шолушысы. Бұған дейін ол 2018 жылы 500 шақырымдық «Астана – Ақтоғай», 2019 жылы 208 шақырымдық «Қарағанды – Жаңаарқа», 2020 жылы Абай атамыздың 175 жылдығына арнап 1088 шақырымға созылған «Нұр-Сұлтан – Жидебай» велошеруін ұйымдастырған.
Мазмұнды сапарға қатысушылар Ыбырай атамыздың өнегелі өмірі мен бай мұрасын насихаттауға атсалысу, сонымен қатар, жұртшылық арасында саламатты өмір салтын ұстану және табиғатты аялауға үндеуді мақсат тұтқан.
Веломарафонның ұзақтығы −750 шақырым, бір бағытқа, яғни «Нұр-Сұлтан − Қостанайға» ғана жасайды, сапар алты күнге созылады деп жобаланған.