Мың жаңа мектеп салынады
<p style="text-align: justify;">Мемлекет басшысы Қасым-Жомарт Тоқаев Қазақстан халқына Жолдауын жария етіп, мемлекеттің тиімділігін және азаматтардың әл-ауқатын арттыруға бағытталған бастамалар мен міндеттерді атап өтті. Қасым-Жомарт Кемелұлы білім және ғылым саласы бойынша да бірқатар маңызды әрі өзекті міндет жүктеді. Президент Жолдауында көзделген тапсырмалардың уақтылы және сапалы орындалуын қамтамасыз ету үшін барлық қажетті шара қабылданады.</p>
Жолдауда айтылғандай, урбанизация және демографиялық процестерге байланысты 2025 жылы мектептерде қосымша шамамен 1 млн орын қажет болады. Бұл мәселені шешу үшін 1 мың жаңа мектеп салынады. Осы жылдың өзінде 200 мектепті ашу жоспарланып отыр.
Оқушылардың біліміндегі олқылықтардың орнын толтыру және оқу бағдарламаларын бейімдеу бойынша шаралар жоспарланған. Сонымен қатар 5 мың мектепті жаңғырту, пәндік кабинеттермен жабдықтау, қосымша білім беруге мемлекеттік тапсырыс бөлу жоспарда бар. Педагогтердің біліктілігін арттыруға ерекше назар аударылады. Әлем қарыштап дамып келе жатқан жағдайда бұл өте маңызды.
Мемлекет басшысы әлеуметтік осал топтағы балаларды қолдауға ерекше көңіл бөлді. Оларға «Цифрлы тәлімгер» жобасы аясында қосымша сабақтар алу мүмкіндігі беріледі.
Қашықтан оқытуға қарамастан, біздің оқушыларымыз әлемдік шыңдарды бағындырып, халықаралық олимпиадаларда өткен жылдардағы рекордтарын жаңартты. Дарынды балаларды қолдау үшін Президенттің тапсырмасына сәйкес конкурсқа қатыспай-ақ гранттар беру, сондай-ақ біржолғы ақшалай сыйлықақылар көзделетін болады.
Президент сондай-ақ толық жинақталған ауыл мектептерін жан басына шаққандағы қаржыландыруға кезең-кезеңмен көшіру жөнінде шаралар қабылдауды тапсырды.
Естеріңізге сала кетейін, 2020 жылдан бастап барлық қалалық мектеп жан басына қаржыландыруға көшті. Бұл шара әртүрлі өңірлерде қаржыландыруды теңестіру, материалдық-техникалық базаны жақсарту, алым-салықтармен байланысты тәуекелдерді едәуір төмендету, мектептердің қаржылық дербестігін арттыру және бюджет қаражатын жұмсау тиімділігін жақсартуға мүмкіндік берді. Бұл бастама білім беру және жекеменшік мектептер ашуға жеке инвестицияларды тартуды ынталандырды.
Жолдауға сәйкес ғылым саласында да елеулі өзгерістер болмақ. Мемлекет басшысы жыл соңына дейін ғылым туралы заңнамаға өзгерістер енгізуді тапсырды. Түзетулер ғалымдарымыз тұрақты және лайықты еңбекақы алуын қамтамасыз етуге бағытталуға тиіс. Ол үшін жетекші ғалымдардың жалақысы базалық қаржыландыруға қосылуы керек.
Біз Президенттің Қазақстан халқына Жолдауында қойылған барлық міндетті іске асыру үшін жоспарлы және жүйелі жұмыс істейтін боламыз.
Асхат АЙМАҒАМБЕТОВ,
Білім және ғылым министрі