US Open: Елена Рыбакина үшінші айналымға шықты
<p style="text-align: justify;">Қазақстанның бірінші, әлемнің 20-ракеткасы Елена Рыбакина US Open турнирінің үшінші айналымына шықты, деп хабарлайды <a href="/" target="_blank" rel="noopener noreferrer">Egemen.kz</a>.</p>
Осы «Үлкен дулыға» додасының 19-ракеткасы болып тіркелген Е.Рыбакина екінші айналымда дүниежүзілік рейтингте 62-орында тұрған франциялық Каролнн Гарсиямен кортқа шықты.
Бір сағаттан астам уақытқа созылған матчта қазақстандық теннисші қарсыласын 6:1, 6:4 есебімен қиналмай ұтты. Е.Рыбакина бәсеке барысында 11 эйс жасап, 6 брейк-пойнттың тең жартысын пайдаланды. Брейкке қол жеткізбеген К.Гарсия 1 ғана эйспен шектелді. Қазақстандық спортшының келесі қарсыласы аса мықты.
Ол – кезінде рейтингте көш бастаған 2018 жылғы Ролан Гаррос, 2019 жылғы Уимблдон турнирлерінің чемпионы, биыл жарақатына байланысты онша өнер көрсете алмаған, қазіргі кезде рейтингте 13-орында тұрған румыниялық Симона Халеп. С.Халеп те екінші кездесуінде словакиялық Кристина Куцованы 6:3, 6:1 есебімен тізе бүктірді.
Еске сала кетейік, бұдан бұрын Ярослава Шведованың US Open турнирінде қарсыласына есе жібергенін, Александр Бубликтің екінші айналымға өткенін, сондай-ақ Юлия Путинцева мен Зарина Диястың Astana Open турниріне қатысатынын жазған болатынбыз.