Экспортқа бағытталған «Бакара»
Еліміздің индустриялық-инновациялық даму бағдарламасы Сабынды ауылының өркендеуіне елеулі серпін берді. Әсіресе, «АстанаАгроӨнім» жауапкершілігі шектеулі серіктестігінің қадамы құтты деуімізге болады. Бүгінгі күні шалғайдағы Сабынды ауылы тұрғындарының басым көпшілігі тұрақты жұмысқа тартылып, ел іші кәдімгідей көркейіп қалды. Мұны жұртшылық заманалық талаптағы «Бакара» ет комбинатының іске қосылуымен байланыстырады.
Еліміздің индустриялық-инновациялық даму бағдарламасы Сабынды ауылының өркендеуіне елеулі серпін берді. Әсіресе, «АстанаАгроӨнім» жауапкершілігі шектеулі серіктестігінің қадамы құтты деуімізге болады. Бүгінгі күні шалғайдағы Сабынды ауылы тұрғындарының басым көпшілігі тұрақты жұмысқа тартылып, ел іші кәдімгідей көркейіп қалды. Мұны жұртшылық заманалық талаптағы «Бакара» ет комбинатының іске қосылуымен байланыстырады.
Кәсіпорын «Агроөнеркәсіп кешенін және ауыл шаруашылығы өнімдерін өңдеу саласында вакуумды орамада тұтас, бұқтырылған және кесілген еттер өндіру кешені» жобасымен 2010 жылы салынған. Жобаны жүзеге асыруға 987 миллион теңге инвестиция тартылған болатын. Оның қайтарымы да ұзын-сонарға салынбай, игі жемісін төгуде. Аудан әкімі Қайыр Рыскелдиновтің жуырдағы халық алдындағы есебінде ұжым қызметіне жоғары баға берілді. «Бакара» 2013 жылдың қорытындысы бойынша 1755 тонна ет өнімдерін өндірді. Оның ішінде 1197 тонна халал ет, 359 тонна шұжық, 203 тонна жартылай фабрикаттар дайындалды. Комбинат былтыр республикамызда бірінші болып Ресей астанасына 16 тонна өнім жөнелтті. Заманалық қайта өңдеу зауыты соңғы екі жылда еңбек өнімділігін он есе ұлғайтып, ай сайын 150 тонна сапалы өнім дайындауда», деді ол.
Небәрі үш жылдың ішінде еліміздің «Алтын сапа» сыйлығын иемденіп, халықаралық «ISO 9001:2000» сертификатымен жұмыс істейтін кәсіпорынның ұлттық мәзірде өңделген отыздан астам ет өнімдері Астана, Алматы, Ақтау, Қарағанды, Ақтөбе, Павлодар, Шымкент, Өскемен қалаларында жоғары сұранысқа ие. Тапсырыс берушілер қатарында Ресейдің Омбы, Новосібір, Челябі облыстары да бар. Талғампаз мәскеуліктер жылқы, сиыр және қой етінен дайындалған шұжық, қазы, сүр ет және басқа ұлттық тағам брендтерінің келісін 2500 теңгеден сатып алуы сауда саясатының қай қырынан алып қарасақ та тиімді.
Кәсіпорынның әу бастан-ақ экспорттық бағыт ұстануына мемлекеттік үдемелі индустриялық-инновациялық даму бағдарламасы мүмкіндік ашқанын айтуымыз керек, дейді «Астана Агро Өнім» ЖШС басшысы Серік Рахымбеков. «Бакара» сауда белгісімен жұмыс істейтін комбинатта Германияның озық технологиясы мен жабдықтары пайдаланылады. Жергілікті жүз тұрғынды жаңа кәсіпке баулып, кәсіби біліктілігін көтеруді өз мойнымызға алдық. Бұл өз кезегінде тәртіп пен жауапкершілікті күшейтті. Осыған сәйкес табыс та өсіп, әлеуметтік қолдау шаралары кеңейді.
Сондай-ақ, ЖШС 2500 қара мал басын бордақылау индустриялық-инновациялық даму жобасын жүзеге асыруда. Мұнда былтырғы жылдың қараша айында 369 миллион теңгенің 460 тонна өнімі айналымға шығарылды. Яғни жобаны жүзеге асыруға жұмсалған 345 миллион теңге қаржы мерзімінен бұрын өтеліп отыр. Биыл заманалық ет комбинаты өзінің жобалық қуатына енеді деп күтілуде.
Бақберген АМАЛБЕК,
«Егемен Қазақстан».
Ақмола облысы,
Қорғалжын ауданы.
––––––––––––––––––––
Суретті түсірген
Ермұрат ДОСЫМОВ.