Сахна саңлақтары – солтүстікте
<p style="text-align: justify;">Ұлыбританияның премьер-министрі У.Черчилль ІІ Дүние­жүзілік соғыс жүріп жатқанда өзіне елдің жылдық бюджетінің жобасын көрсеткен қаржы минис­трінен: «Мәдениетке бөлі­нетін қаржы қайда?» деп сұрапты. Қаржы минис­трі: «Соғыс жүріп жатқанда қай­дағы мәдениет?» дегенде ұлы адам: «Сонда біз не үшін соғысып жа­тырмыз?» деген екен. Сол айт­қандай, қандай қиындықтар кезінде де мәдениет тоқырауға тиіс емес. Соның бір айғағындай бо­лып М.Әуезов атындағы Ұлттық драма театры Қызылжарға алты күн­дік гас­трольдік сапармен келіп, шынайы өнерге сусаған халықтың шөлін қандырды. Олар Н.По­годин атындағы орыс драма театрының сахнасында өнер көр­сетті. Пандемиядан қорғану режі­мін сақтай отырып, күніне екі спектакль қойылды.</p>
Біз аталған театр директорының шығармашылық жөніндегі орынбасары, Қазақстанның еңбек сіңірген қайраткері Жалғас Толғанбайды әңгімеге тартып, шағын сұхбат құрған едік.
«Былтыр мына індеттің кесірінен ешқайда шыға алмадық. Биыл Мәдениет және спорт министрлігінің рұқсатымен алдымен Көкшетау қаласында болып, енді, міне, Қызылжар қаласында гастрольдік сапармен жүрміз. Мұнда келмегенімізге жиырма жылға жуықтаған. Бұдан бұрын, 2003 жылы «Қазақстанның Ресейдегі жылы» болғанда Омбы қаласына барып, жол-жөнекей осында үш спектакль қойғанбыз. Халықтың ыстық ықыласына қарағанда, сахна саңлақтарын сағынып қалғандары көрініп тұр. Бұл жолы театрымыздың бірнеше жанрды қамтыған ең жақсы спектакльдерін алып келдік. Соның ішінде Д.Исабековтің «Жаужүрек», М.Жұмабаевқа арналған «Жүз жылдық махаббат», Т.Нұрмағанбетовтің «Бес бойдаққа бір той», А.Володиннің «Қоштасқым келмейді», И.Сапарбайдың «Сыған серенадасы» спектакльдері және театрымыздың жас режиссері Жұлдызбек Жұманбайдың қойылымындағы Абайдың қарасөздеріне құрылған «Қара» инсценировкасы бар. Сонымен бірге өзіміздің театрымыздың талантты актрисалары Назгүл Қарабалина (идея авторы) мен Баян Қажынәбиева дайындаған «Туған күн» атты бір актердің орындауымен қойылған моноспектакльді әкелдік. Оны С.Мұқанов атындағы қазақ театрында қойдық. Күн суықтау болса да халықтың елжіреп, жүрек жылуын сыйлағанын көрдік. Сондықтан барлық көрерменге, соның ішінде ауыл-аудандардан арнайы келген ағайынға, бізді қуана қарсы алып, құрмет көрсетіп жатқан облыс басшылығына, барлық мәселемізді шешіп берген орыс және қазақ театрының директорлары Спартак Рамазанов пен Біржан Жалғасбаевқа айтар алғысымыз шексіз», деді ол.
Әкемтеатр Қызылжарға індетке байланысты өнерпаздарының 60 жасқа дейінгі орта буын өкілдерін ғана әкелген екен. Сондықтан труппаны құраған алпысқа жуық адамның негізгі бөлігі жастар. Олардың арасында Бекжан Тұрыс, Дулыға Ақмолда, Асылбек Боранбай, Дария Жүсіп, Шынар Асқарова, Гүлнәр Жақыпова сияқты есімдері елге танымал актерлер бар. Солардың ішінде жерлесіміз Күнсұлу Шаяхметова да болды. «Театр ғана емес, кино, радио, дубляж сияқты өнердің барлық саласын меңгерген, өзіндік үні бар жерлестеріңізге халықтың ықыласы да ерекше екенін көрдік. Ол сахнаға шыққанда халықтың құрметі, ұзақ соққан шапалағы айрықша болды. Кеше туып-өскен ауданының әкімі де келіп, халық атынан ол кісіге арнаулы сый-сияпатын жасады», деді Жалғас Толғанбай.
Театрдың гастрольдік сапарын бастап келген директоры, белгілі өнер қайраткері Еркін Жуасбек. Қызылжарлықтар М.Әуезов театрымен қимай қоштасады. Тек үзіліс ұзаққа созылмай, шынайы дарындар жиі келіп тұрса деген тілек айтылады.