Қытай Тайваньмен қосылуды көздейді
<p style="text-align: justify;">Қытай басшы­сы Си Цзинь­пин Тайваньмен «бейбіт түрде қосы­латынына» уәде берді. Кейінгі уақыт­та аталған өңірдегі ахуал ха­лық­аралық қоғамдастықтың алаңдау­шылығын туғызып отыр.</p>
Тайвань тарапы Си Цзиньпиннің әрекетін айыптап, Бейжіңді мәжбүрлеу жоспарынан бас тартуға шақырды. Сондай-ақ ел болашағын тек Тайвань халқы шеше алатынын тағы да ашық айтты.
Демократиялық жолмен жүретін Тайваньнің егемендігін Бейжің билігі мойындаған емес. Бірақ Тайпей өз бостандығын қорғауға уәде берді.
Тайваньда президент кеңсесі өздерінің Қытай Халық Республикасының құрамына кірмейтін, егемен, тәуелсіз ел екенін мәлімдеді. Сондай-ақ Қытайдың «бір ел, екі жүйе» туралы жоспарын қабылдамайтынын тағы да қайталап айтты. «Ұлттың болашағы – Тайвань халқының қолында», делінген президент әкімшілігі жариялаған хабарламада.
АҚШ Мемлекеттік департаментінің өкілі Вашингтонның Тайваньға қатысты ұстанымы өзгеріссіз қалатынын қайталап, америкалықтар Тайвань халқының тілектері мен мүдделерін ескеріп, өңірдегі мәселелерді бейбіт жолмен шешуді қолдайтынын жеткізген.
«Біз Бейжіңнің Тайваньға қарсы әскери, дипломатиялық және экономикалық қысымын тоқтатып, Тайваньмен маңызды диалог жүргізуге шақырамыз», деді баспасөз хатшысы.
Ақпарат құралдарының хабарлауынша, Қытай әуе күштері 1 қазаннан бастап Тайваньның әуе кеңістігін бұзып кірген. Оған 150 -ге жуық ұшақ қатысқан, алайда бұл заңсыздық аяқталды.