Бәрекелді, Виктория!
<p style="text-align: justify;">Түркістан қаласында үстел теннисінен 2008 жылы туған және одан кіші спортшылар арасында өткен Қазақстан чемпионатында Қарағанды облысының намысын қорғаған Виктория Мочалкина абсолютті жеңімпаз атанды.</p>
Атап айтқанда 12 жастағы дарынды спортшы қыздар командасы сапында, жекелей біріншілікте, қыздар жұбы және аралас жұп бойынша өткен сайыстарда жеңіске жетіп, төрт бірдей алтын жүлдеге ие болды.
Виктория Мочалкина жеті жылдан бері үстел теннисімен айналысады. Қазірдің өзінде оның қол жеткізген табысы айтарлықтай. Мысалы, ол өз жас санаты бойынша еліміздің бірнеше дүркін чемпионы атанған, 21 жасқа дейінгілер арасындағы командалық есепте Қазақстанның чемпионы болған.
Виктория үстел теннисінің өзіне қатты ұнайтынын айтады.
– Бұл өте қызықты спорт түрі. Адамды өзіне баурап алады, сонан кейін, реакцияны қатты дамытатын ойын. Өткен чемпионатқа келсек, ол маған соншалықты қиын болған жоқ. Қарсыластарымның барлығымен бұрын күш сынасқанмын. Бұл жерде еш қобалжымау керек. Сонда ғана жеңіс сенің жағыңда болады, – дейді балғын чемпион.
Виктория сынды талантты спортшыны үстел теннисінен Ұлттық құрама команданың бас бапкері Эльмира Әлиева жаттықтырады.
Қазіргі уақытта еліміздің су жаңа чемпионы Алматы қаласында 28 қазан мен 3 қараша аралығында жасөспірімдер арасында өтетін халықаралық «Алтын күз» турниріне дайындалып жүр.