Суретшілер үйі ашылды
<p style="text-align: justify;">Түркістан облысы Төле би ауданында халық­ара­­­лық деңгейде та­ныл­ған суретшілер көп. Ел Тә­­уел­сіздігінің 30 жыл­дық мерекесі аясында Ақ­құм ауы­лында «Сурет­ші­лер үйі» ашылды. Өнер ор­та­лығының ашылуына осы өлкенің тумасы, Қа­зақ­стан Суретшілер ода­­ғының мүшесі Құт­ты­бек Жа­қыпов мұрындық болды.</p>
«Суретшілер үйінің» ашылу салтанатына аудан әкімі Төлеген Телғараев, ауданның құрметті азаматы, мәдениет жанашыры Күлия Айдарбекова, Суретшілер одағының төрағасы Өмірбек Жұбаниязов қатысып, жиналған қауымға жүрекжарды тілектерін жеткізді. Сондай-ақ мәдениет үйінде еліміздің өңірлерінен және шетелдерден келген өнер иелеріне Құттыбек Тыныбекұлының туындылары таныстырылып, өнер иесінің «Төлеби – Ұлы дала мекенім» атты шығармашылық кеші өтті. «Ұлтымыздың тарихын, салт-дәстүр, әдет-ғұрып, тұрмыс тіршілігін бейнелі әрі көркем түсіндіретін халықаралық деңгейде ұйымдастырылып жатқан «Төлеби – Ұлы дала мекенім» атты суретшілер плэнеріне көршілес Өзбекстан, Қырғызстан мемлекеті мен Нұр-Сұлтан, Алматы қалаларынан халықаралық дәрежедегі сурет шеберлері келіп отыр. Плэнермен бірге жас суретшілердің шығармашылығына серпін беретін облыстық «Бір өлке – бір сурет!» атты жас суретшілер симпозиумының өтуі де көп жайтты аңғартады», дейді аудан басшысы Төлеген Тұртайұлы.