Машина жасаудағы маңызды келісім

Жуырда Ыстанбұлда Win Eurasia халық­аралық көрмесі ұйымдастырылды. Атал­ған шараға Қазақстаннан арнайы делега­ция барып қатысты. Отандастарымыз көр­ме аясында түркиялық және өзге де мем­ле­кет­т­ердің машина жасау саласындағы кәсіп­орындары өкілдерімен кездесті. Біздің тараптан бұл шараға Қазақстан машина жасаушылар одағының басқарма төр­­ағасы М.Пішембаев, Maker және «Астана электртехникалық зауыты» кәсіпорын­дары­ның басшылары, Kazakh Invest ұлттық ком­паниясының өкілдері қатысты.

Қазақстан машина жасаушылар одағы­ның баспасөз қызметі хабарлағандай, біздің делегация Түркия машина жасау федерациясы (MAKFED) директорлар кеңесінің төрағасы Аднан Далгакиранмен, сондай-ақ белгілі машина жасау кәсіпорындарының басшыларымен кездесулер өткізген.

– Кездесу барысында Қазақстан мен Түр­кия арасындағы экономикалық бай­ла­ныс­тарды дамытуға бағытталған машина жасау­дағы ынтымақтастық мәселелері тал­қы­ланды. Түркиялық әріптестерге Қазақ­станның машина жасау саласындағы өндіріс көлемінің жыл өткен сайын артып келе жат­қаны баяндалды. Сондай-ақ импорт көлемі туралы ақпарат берілді. 2020 жы­лы Қазақстанның импорты 38 млрд дол­ларға тең болды. Оның 17 млрд доллары ма­шина жасау өнімдерінің импортына тие­сілі. Бұл елдегі жалпы импорт көлемінің 45 пайызын құрайды. Салада сұраныс бар. Сондықтан даму мен инвестиция­лық ынтымақтастықтың әлеуеті де жоғары, – деді Мейрам Пішембаев.

Бұдан бөлек қазақстандық делега­ция кездесуге қатысушыларға өнеркәсіптік кооперацияның перспективалары, мұнай-газ және тау-кен металлургиядағы машина жасаудың өзара тиімді ынтымақтастығы туралы баяндады.

– Біз шетелдік инвесторларды озық технологиялар мен құзыреттерді трансферттеуге, Қазақстанның және болашақта Еуразиялық экономикалық одаққа мүше елдердің нарығын бірлесіп дамытуға шақы­рамыз, – дейді Қазақстан машина жасаушылар одағының басқарма төрағасы.

MAKFED директорлар кеңесінің төр­ағасы Аднан Далгакиран Қазақстанды бауыр­лас ел әрі Түркияның негізгі серік­тесі санайтынын, сондықтан Қазақ­станда әле­ует­­ті жобаларды іске асыру мүмкін­дік­терін пы­сықтауға әзір екенін жеткізді. Өз ке­зе­­гінде қазақстандық делегация шетелдік әріп­тес­­терін келер жылы өтетін Қазақстан маши­на жасаушыларының Х форумына және халық­аралық Kazakhstan Machinery Fair-2022 машина жасау және металл өңдеу маман­дан­дырылған көрмесіне қаты­суға шақырды.

Келіссөздер нәтижесінде Maker ЖШС-нің басқарма төрағасы Ж.Байғабылов Түркияның Okerel және Pres-San компанияларымен меморандумға қол қойды. Бұл келісім бизнестің жаңа ұзақ мерзімді серіктестік қатынастарын орнатуға, сондай-ақ Қазақстан мен Түркияның машина жасау саласындағы кәсіпорындарымен бірлескен жобаларды жүзеге асыруға бағытталған.