Азық-түлік себеттерін алды
<p style="text-align: justify;">«Ел тірегі – Елбасы» акциясы аясында Қостанайда «Халық» қоры ұйымдастырған қайырымдылық шарада мүмкіндігі шектеулі балалары бар 200-ден астам мұқтаж отбасы азық-түлік себеттерін алды. Әрқайсының салмағы 50 кило болатын әлеуметтік қораптың ішінде күріш, қарақұмық, ұн, макарон, сұйық май, бұқтырылған ет, қант, шай және кәмпиттер бар.</p>
Ауқымды шараға «Жанашыр бол» қоғамдық қорының волонтерлері де атсалысты. Ерікті жастар азық-түлік себеттерін қаланың әр түкпірінде тұрып жатқан тұрмысы төмен, сондай-ақ көп бала тәрбиелеп отырған отбасылардың үйіне жеткізіп берді.
– Үш күн ішінде 251 отбасына азық-түлік себеттерін тараттық. Мұқтаж отбасылардың үйіне жылу сыйлайтын мұндай игі шаралар жиі ұйымдастырылып тұру керек. Әсіресе сәбилердің қуанғанын көргенде осынау шарапатты істің сауабы мол екеніне көзіміз жете түседі, – дейді «Жанашыр бол» ҚҚ-ның волонтері Салтанат Ықыласова.
Ұйымдастырушылар азық-түлік себеттерінің бәрін Тәуелсіздік мерекесіне дейін үлестіріп бермек. Мұндай іс-шаралар Қостанай қаласын ғана емес, облыс аудандарына қарасты алыс-жақын ауылдарды да қамтитын болады.
Қостанай облысы