Кембридждегі қазақ кереметі
<p style="text-align: justify;">Кембридж университеті жанын­дағы Фицуильям мұражайында «Ұлы дала алтыны» көрмесінің ресми жабылуы өтті. Британдық БАҚ «халықаралық сенсация» деп атаған және Apollo журналы әлемнің үздік алты көр­ме­сінің бірі деп атаған біре­гей көр­ме Ұлыбританияда төрт айға жал­ғасты.</p>
Елдегі карантиндік шектеулерге қарамастан, Қазақстан Республикасы Тәуелсіздігінің 30 жылдығына арналған көрмені 25 мыңға жуық адам тамашалады.
Көрмеде Шығыс Қазақстан облысындағы Берел, Шілікті және Елеке Сазы жерлеу кешендерінен біздің дәуірімізге дейінгі VIII-III ғасырларға жататын жүздеген бірегей алтын жәдігер ұсынылды.
Экспонаттар келушілерге сақтардың тұрмысын, тарихы мен мұрасын тануға, сондай-ақ ежелгі көшпенділердің қазіргі қазақ мәдениетімен түйісу нүктелерін зерттеуге мүмкіндік берді.
Жабылу салтанатында сөз сөйлеген Қазақстанның Ұлыбританиядағы елшісі Ерлан Ыдырысов көрменің халықаралық аудиторияға Қазақстанның бай тарихын ашқанын және ортақ мақсат – ежелгі ақпарат көздерін ашып, адамзат тарихын тереңірек тануға ұмтылу жолындағы ғылыми және мәдени ынтымақтастықтың көрінісі болғанын атап өтті.
Фицуильям мұражайының директоры Люк Сайсон Шығыс Қазақстан тарихи-өлкетану мұражайының басшылығына, профессорлар Зейнолла Самашев пен Әбдеш Төлеубековке тығыз ынтымақтастық үшін алғысын білдіріп, көрме барысында Кембридж университетінің ғалымдары қазақстандық археологтермен бірлесіп, бірегей сақ артефактілерін зерттегенін айтты.
Ғылыми зерттеулердің нәтижелері алдағы айларда әлемдік қауымдастыққа ұсынылады.
Мұражай директоры сондай-ақ көрме мен оған ілеспе зерттеулер Қазақстан мен Ұлыбританияның ғылыми қоғамдастықтары арасындағы ынтымақтастықты тереңдету үшін берік іргетас қалағанын атап өтті.