Қираған ғимараттар қашан қалпына келеді?
<p style="text-align: justify;">Қаңтар айындағы қайғылы оқиғаның зардабы Жетісу жерінде де сезілген болатын. Жаппай тәртіпсіздіктің салдары облыс орталығы Талдықорған қаласында ерекше байқалды. Сол тұста ел Президентінің Жарлығымен аймақта төтенше жағдай жарияланып, террорлық қауіптің «қызыл деңгейі» белгіленген-ді. Қазір өңірде зардап шегіп, қираған нысандарды қалыпқа келтіру жұмысы қызу жүріп жатыр.</p>
Бүлікшілер бұлғақтың алғашқы күні облыс әкімдігінің, қалалық полиция басқармасының ғимараттарына басып кіріп, нысандарға өрт қойған еді. Нәтижесінде, бейбіт тұрғындар да зардап шегіп, көптеген адам медициналық көмекке жүгінді. Сол бұлғақ кезінде Талдықорған қаласындағы бірнеше сауда нүктесі де зардап шекті. Оның арасында «Технодом» сауда үйі мен «Қарағаш» сауда орталығы шабуылдың негізгі нысанасына айналды. Бұзақылар тұрмыстық техника мен зергерлік бұйымдарды тонап кетті. Облыстық кәсіпкерлер палатасының дерегіне қарағанда, аймақтағы 143 сауда нысаны зардап шеккен көрінеді. Кәсіпкерлерге келтірілген шығын көлемі 8,8 млрд теңге шамасында деген шешім шыққан.
Бүгінде Талдықорған қаласындағы бүлінген ғимараттарды жөндеу жұмысы жалғасуда. Бұл қатарда облыстық және қалалық ішкі істер басқармасының ғимараттары, ҰҚК облыстық департаментінің ғимараты және Nur Otan партиясының жеке ғимараты бар. Аталған нысандардағы құрылыс аяқталғасын қалыпты тіршілікке кіріспек. Ал жөндеуге кететін шығын көлемі 4,5 млрд теңге шамасында есептелді.
– Дүрбелең кезінде Талдықорған қаласында 5 ғимаратқа зақым келді. Оның ішінде облыстық әкімдік үйі толықтай жанып кеткен болатын. Қазір ғимарат ішінде тазарту жұмыстары аяқталды. Қалыпқа келтіру бойынша зерттеу-сараптама жұмысын жүргізудеміз, онымен «КазНИСА» компаниясы айналысуда. Қорытынды дайын болғаннан кейін ғимаратты қайта қалпына келтіруге бола ма, әлде жаңадан нысан соғу қажет пе деген сұраққа жауап аламыз. Бұл ғимарат 1972 жылы қолданысқа берілген, өте ескі нысандар қатарында. Нысанды толықтай сараптамадан өткізу үшін 19 млн теңге шамасында қаражат жұмсалады. Ал жобалау жұмысына 150 млн теңгедей кетуі мүмкін. Мұның бәрін сараптама қорытындысы дайын болғаннан кейін нақты айта аламыз, – дейді Алматы облыстық құрылыс басқармасы басшысының орынбасары Еркебұлан Усманбаев.
Алматы облысы