Жырдың жезкиігі
<p style="text-align: justify;">Биыл көрнекті ақын, мемлекет және қоғам қайраткері Кәкімбек Салықовтың туғанына 90 жыл толды. Соған орай астанадағы Ұлттық академиялық кітапханада ардақты ақынды еске алуға арналған «Жыр әлемінің жезкиігі» атты әдеби кеш өтті.</p>
Мазмұнды кешті ашып жүргізген ақын, Қазақстан Жазушылар одағының Нұр-Сұлтан қалалық филиалының директоры Дәулеткерей Кәпұлы Кәкімбек ағамыздың биылғы айтулы мерейтойына байланысты бірқатар іс-шара жоспарланғанын айта келіп, астанадағы ақын тұрған үйге ескерткіш-тақта орнатылатындығын жеткізді.
Одан кейін белгілі ақын, Халықаралық «Алаш» әдеби сыйлығының лауреаты Ғалым Жайлыбай ол кісіні он бес жасынан бастап танып, көзі тірісінде ағалы-інілідей жақын сыйласқандығын сөз етті.
– Кәкімбек Салықов – есімі үлкен әріппен жазылатын, жалпақ қазақ танитын тұлға. Ол екі формацияда өмір сүріп, кешегі Кеңес одағын басқарған Брежнев, Черненколармен қатар жұмыс істеп, қазақтың бір баласы ретінде биікке шыққан, аңыз адам. Ол кісі академик «Қаныш Сәтбаев» қорын басқарғанда мені бірге жұмыс істеуге қасына шақырып алды. Сонда асыл ағаны жақын танып, адами ғажайып асыл қасиеттеріне тәнті болдым. Қазақты бөліп-жармай тұтас жақсы көретін. Тұмағаңдармен достығы да керемет еді. Алғашқы жыр жинақтарымен оқырмандарының ықыласына бөленді. Ақындық пен кеншілікті құстың қос қанатындай қатар алып жүрген ақынның поэзиясы тереңдік пен биіктік деген өлшемге лайық, – деді ол.
Сондай-ақ жазушы-драматург Өтен Ахмет, қарымды қаламгер Баянғали Әлімжанов, тарих ғылымдарының докторы Марат Әбсеметов, күйші Жанғали Жүзбай және тағы басқа зиялы қауым өкілдері тұғырлы тұлғаның жан-жақты қырына тоқталып, жылы әсерге толы естелік өрбітті. Кеш барысында арқалы ақынның өлеңіне жазылған «Жезкиіктен» бастап, ел сүйіп тыңдайтын бірқатар ән орындалды.