Мемлекеттік қызмет проактивті түрде ұсынылуға тиіс

Цифрлы трансформация – жү­йелі реформаларды іске асы­ру­­дың, мемлекеттік басқару­ды жетіл­дірудің және халық се­ні­мін арттырудың түйінді құ­рал­дарының бірі. Бұл үрдісті ба­рын­ша тиімді, қолайлы және өнімді іске асыру үшін Цифрлы офицерлер институты құрылып, былтыр цифрландыруға жауапты вице-министрлерге арналған (CDO) KPI жүйесі енгізілген еді.

«Әсіресе бүгінгі жағдайда CDO – инновациялық және тех­но­логиялық экономиканы қа­лып­тастыру жолында жүйелі өзге­ріс­тердің драйвері. Олар өздері қа­дағалайтын салаларда, яғни ауыл шаруашылығы, өнер­кәсіп, энергетика және тағы басқа салада инновацияларды енгізіп, жаһандық үрдістерден қал­май инновациялық экожү­йені қалыптастырып, міндет­тер­ді жүзеге асыру үшін отан­дық стартаптарды тарта оты­ра халықаралық BigTech ком­па­ниялар мен отандық ғылы­ми қауымдастықтың мүмкін­дік­терін кеңінен пайдалану тиіс», деді Цифрлық даму, инно­ва­циялар және аэроғарыш өнер­кәсібі министрі Бағдат Мусин.

Ведомство басшысы айтқан­дай, елді мекендерді интернетпен қамту, байланыс сапасын арттыру және ақпараттық қауіп­сіздікті қамтамасыз ету бағы­тында да біраз жұмыс атқа­рылды. Атап айтқанда, бас шаһар мен Алматы, Шымкент қала­ларында сынақтан өткізіліп жатқан 5G буын технология­сын биыл осы қалаларда ком­мер­циялық мақсатта енгізу көз­деліп отыр. 2021 жылдың қоры­тын­дысына сәйкес, 1 257 ауыл талшықты-оптикалық байланыс желілері (ТОБЖ) арқылы кең жолақты интернетпен, 928 елді мекен мобильді интернетпен қамтылды.

Байланыс сапасын арттыруға да баса назар аударылып жатыр дейді министрлік өкіл­дері. Былтыр 611 елді мекенде мобиль­ді интернет жақсартылса, биыл да 157 ауылдағы интернет сапасын арттыру жұмыстары жоспарланған. 2021 жылы ведомство мамандары байла­ныс сапасы бойынша 562 тек­серіс жүргізіп, бекітілген пара­метр­лерді бұзғаны үшін байланыс операторларына 132 млн теңге айыппұл салынды. Бұл орайда биыл сапасыз байланысқа айыппұл көлемін 1 500 АЕК-ке дейін көтеру жоспарда бар.

Қазір Каспий теңізінің түбінде ТОБЖ салу жұмыстары қолға алынып, бұл – елімізді Еуразия орталығындағы цифр­лы хабқа айналдыру жолын­д­ағы маңызды және ауқымды жобалардың біріне айналдырады.

Сондай-ақ былтыр Қазақстан +997 телефонды кодын резервке алып, бірақ әлі де +7 айма­ғын­да қалу мүмкіндігі бар. Осы бағыт­та құзырлы орган мамандары ре­сейлік тараппен және Ха­лық­ара­лық электрбайланыс одағы­мен тиісті жұмыстар жүр­гізіп жатыр.

Мемлекеттік қызметтер­ді жетілдіру, бизнес-процестер­ге реинжиниринг жасау жұмыс­тары да қарқынды жүріп жатыр. Бұл орайда 110 бизнес-процеске анализ жасалып, қажетсіз үдеріс­тер анықталды. Қазір өзекті про­цестерді цифрлау басталып, оң нәтижесі байқалып жатыр.

Бүгінде бірқатар маңызды мемлекеттік қызмет проактивті түрде көрсетіледі. Алайда ми­нистр­­дің айтуынша, барлық қыз­­мет проактивті форматта ұсы­ны­­луы тиіс, демек азаматтар түрлі ме­­ке­­мелерге жүгініп, табан тоз­дыр­­­мауы керек. Осы бағытта ми­нистр­­лік 2022 жылы тағы 20 про­ак­­тивті қызмет енгізуді жос­парлап отыр.

Алқа мәжілісі барысында еліміздегі аэроғарыш өнеркәсібі саласындағы мәселелер, геодезия және картография саласында атқарылып жатқан жұмыстар мен «Халық үніне құлақ асатын мем­лекет» тұжырымдамасы ая­сында жүзеге асып жатқан жобалар, цифрлы сервистердің ен­гізілуі жөніндегі маңызды мәсе­лелер пысықталып, жан-жақты талқыланды.