Тұран даласына күй шашу
<p style="text-align: justify;">Түркістан облысының Сайрам, Созақ аудандарының тұрғындарын тамаша өнерімен тәнті еткен Құрманғазы атындағы Қазақ мемлекеттік академиялық халық аспаптары оркестрінің «Тұран даласына күй шашу» атты гастрольдік концерті облыс орталығында жалғасын тапты.</p>
Киелі Түркістанға арнайы келген тарихи оркестр «Конгресс холл» көпсалалы кешенінде қазақ халқының дәулескер күйшілерінің күйлері мен ұлы композиторларының әндерінен шашу шашты. Сонымен бірге әлем музыканттарының классикалық туындыларын тарту етті.
Концертте Қазақстанның еңбек сіңірген әртісі – Майра Мұхамедқызы, Қазақстанның еңбек сіңірген қайраткерлері – Жұбаныш Жексенұлы, Жеңіс Ысқақова, Мәдениет саласының үздігі Айнұр Әбілдаева ән шырқап жұртшылықтың ықыласына бөленді.
Оркестрдің бас дирижері – «Дарын» жастар сыйлығының лауреаты Абылай Тілепберген мен дирижер, мәдениет қайраткері Жексен Айсын да оркестрді шабыттандырып, музыка әлеміне жетелей білді. Мазмұнды да әсерлі кеш сыйлаған оркестр ұжымына түркістандықтар ризашылықтарын білдіріп, құрмет көрсетті. Оркестрдің облыстағы өнер сапары Ордабасы ауданында түйінделмек.