Әскери кафедрадағы салтанатты жиын
<p style="text-align: justify;">Л.Н.Гумилев атындағы Еуразия ұлттық университетінің әскери кафедрасында Қазақстан Республикасы Қарулы Күштерінің 30 жылдығы, Отан қорғаушылар күніне және Екінші дүниежүзілік соғыстағы Ұлы Жеңіс күнінің 77 жылдығына арналған салтанатты іс-шара өтті.</p>
Университет ректоры Ерлан Сыдықов жастарға арнаған сөзінде кафедраның қазіргі студенттері Отанға адал қызмет етіп, осы салада белгілі бір биіктерге жететініне сенім білдірді.
«Жолдауда Мемлекет басшысы Қарулы Күштерді қолдауға ерекше назар аударды. Сіздер тұтас стратегиялық саланың дамуына өз үлестеріңізді қосатындарыңызға сенемін», деп атап өтті Ерлан Батташұлы.
Әскери кафедра меңгерушісі, генерал-майор Еділ Оразов қатысушыларды келе жатқан мерекелермен құттықтап, Екінші дүниежүзілік соғыстағы майдангер ата-апаларымыздың ерлігі ұмыт қалмайтынын атап өтті. «Олардың соғыс кезінде жасаған ерліктері, жас ұрпаққа мәңгілік естелік және үлгі», деді генерал-майор.
Сондай-ақ кафедра меңгерушісі Еуразия ұлттық университеті әскери кафедрасының дамуы туралы айтып берді. «Біздің кафедрада ел алдындағы борышын абыроймен атқарып келе жатқан және алдыңғы ұрпақтың ісін жалғастырып жатқан ұрпақ аз емес. Кафедра қызметкерлері студенттерге жоғары интеллектуалдық және кәсіби деңгейде дәріс оқиды. Бай кәсіби тәжірибесінің арқасында олар білім алушыларға әскери-патриоттық тәрбие беруде», деп атап өтті ол.
Бұрын Еуразия ұлттық университетінің әскери кафедрасын басқарған генерал-майор Уәли Еламанов та салтанатты іс-шараға қатысушыларға өз тілегін арнады. «Мен Еуразия ұлттық университетінің әскери кафедрасы студенттерді жоғары сапалы даярлайтынын білемін. Олардың ішкі рухы, дайындықтары әскери істерге қатысты әскери мектептердің курсанттарынан еш кем түспейтінін айта кету керек», деді ол.
Сахна төрінен әскери кафедра тәрбиеленушілеріне Л.Н.Гумилев атындағы ЕҰУ Ардагерлер кеңесінің төрағасы Күлзира Ысқақова, Нұр-Сұлтан қаласының «Жас сарбаз» қозғалысының өкілі Әділхан Маханбет және басқалар сөз сөйледі.
Салтанатты жиын аясында кафедра қызметкерлері мен студенттерді Қорғаныс министрі мен Л.Н.Гумилев атындағы ЕҰУ ректорының грамоталарымен марапаттау рәсімі өтіп, іс-шара мерекелік концертпен аяқталды.
Айта кету керек, жиырма жыл ішінде әскери кафедра бес мыңнан астам маман даярласа, олардың 400-і Қарулы Күштер қатарына шақырылған. Бүгінгі таңда 45 адамнан тұратын кафедраның профессорлық-оқытушылық құрамы мыңға жуық студентті оқытады.