Харьков қақтығысы

Харьков мэрі Игорь Терехов ВВС-ге берген сұхбатында Ресей әскерлері Украинаның екінші үлкен қаласы маңайынан кетіп жатқанын айтқан көрінеді. Соңғы екі аптада Украина қа­ру­лы күштері Харьков облы­сын­дағы бірнеше елді мекен­ді азат етті. Тіпті кей бағыт­та Ук­раи­наның мемле­кет­тік шекарасына дейін жеткен-ді. Ресей әскері Харьков қаласына кірген жоқ, бірақ шаһарға жақындап, ауыр артиллерияның бүкіл тү­рі­­нен оқ жаудырды.

Зымыран салдарынан Харь­ков қаласының орталық ала­ңын­дағы облыстық мемле­кет­тік әкімшіліктің ғимараты, Ук­раи­на­ның ішкі істер министр­лі­гі мен қауіпсіздік қызметінің кеңселері, сондай-ақ қалалық әкімдік ғи­ма­­раты қираған. Ша­һардағы Северная Салтовка тұрғын ауда­ны артиллериялық атқылаудан қат­ты зардап шек­ті. Ондағы үй­лер қирап, тұр­ғындардың көп­ші­лі­гі босып кетуге мәжбүр болды.

BBC агенттігіне сұхбат берген Тереховтың айтуынша, Украи­на қарулы күштерінің қарсы шабуылы басталғалы бес күн­нен бері Харьковты атқылау тоқтаған. Осы уақыт ішінде Ресей сарбаздары Харьков әуе­жайы аймағында зымыран ұшыруға әрекет жасаған екен. Бірақ оны Украинаның әуе қорғаныс күштері атып түсірген.

Сондай-ақ қаланы атқылау­дың салдарынан трамвай паркі­нің жартысынан астамы және 35 шақырым электр желісі қираған. Сондықтан қоғамдық көліктер біраз уақытқа дейін толыққанды жұмыс істей алмайды. Метро да тоқ­тап тұр.

Америкалық соғысты зерттеу институты (ISW) 13 мамыр күні кешке жарияланған зерт­теуінде ресейлік әске­ри­лер Харьков тө­ңі­регіндегі позиция­ларын толы­ғымен тас­тауға ше­шім қа­был­дады деп мәлім­деді.

Мұның басты себебі ретінде Украина әскерінің қарсы шабуылы сәтті жүріп жатқа­нын, Донбастағы ресейлік бөлімше­лер­ді күшейту қажеттігі деп есеп­тейді. Дегенмен Ресей әс­кері әлі де Харьков облы­сын­дағы бірнеше маңызды елді ме­кенді бақылауында ұстап отыр. Сол арқылы темір жолмен Донбасс аймағындағы әскерін қам­тамасыз етпек. Сонымен қатар Изюм бағыты да аса ма­ңызға ие.

Украина президенті кеңсесі басшысының кеңесшісі Алексей Арестович сенбі күні YouTube-тегі Фейгин-Live арнасына берген сұхбатында украин күш­те­рі Изюм бағытында қарсы шабуылға шыққанын хабарлады. 

Өткен жұмада Украина тарапы Донбасста өзеннен өтпек болған Ресейдің бронды колон­насын қиратқанын мәлім­де­ді. Рейтер агенттігінің хабарлауынша, Украинаның әуе-шабуыл­даушы әскерлерінің қолбас­шы­лы­ғы таратқан кадр­ларда өртеніп кеткен ондаған броньды көлік пен суға батқан понтон көпірі көрсетілген. Сондай-ақ қирап қал­ған онда­ған танк, броньды кө­лік пен түрлі әскери техника бар.

Әйтсе де, сарапшылар Харь­ков маңындағы соғыс аяқталды деп есептемейді. Ресей тара­пы бұл қалаға тағы да ша­буыл жасауы мүмкін. Сон­дық­­тан Украина тарапы шаһар тұр­­ғындарын босаңсымауға шақырып отыр.