Тұлғалар бейнеленген композициялар
<p style="text-align: justify;">Елордадағы Ұлттық музейде Қазақстан Сурет­шілер одағының мүшесі, белгілі қылқалам шебері Мұхтар Байбосынның XIX-XX ға­сырда өмір сүріп, қазақ өнерінің мерейін асырған ай­тулы тұл­ғаларға арнал­ған «Асыл мұра» атты жеке көр­месі ашылды.</p>
Мазмұнды іс-шараның ашылуында Ұлттық музейдің ғылыми хатшысы Саялбек Гиззатов көрменің маңызына тоқталды.
«Мұхтар Қайратұлы – халқымыздың дәстүрлі мәдениетін бейнелеу өнері арқылы таныстырып келеді. Оның ұлағатты ұстаз ретінде өнерлі жастардың биікке самғауына атсалысып жүрген еңбегі де ерен. Бүгінгі көрмеде суретші қазақтың біртуар ақындары мен дәулескер күйшілерінің бейнелік образдары мен сюжеттік әңгімелерін қамтыған портреттік композицияларын ұсынып отыр. Сондықтан аталған өнер туындылары талғампаз көрерменнің жүрегінен орын алатынына сенімдімін», деді ол.
Көрмеге қылқалам шеберінің ұлттық өнеріміздің тарихында есімдері мәңгілік қалған Ақан сері, Біржан сал, Естай Беркімбаев, Жаяу Мұса, Мұхит Мерәліұлы, Әсет Найманбайұлы, Үкілі Ыбырай, Дина Нұрпейісова, Кенен Әзірбаев, Нартай Бекежанов, Майра Уәлиқызы секілді бірегей өнер иелерінің портреттік композициялары қойылды. Бұл картиналардың бәрі кескіндеме және графикалық үлгіде салынған. Суретші әр жұмысында детальға ерекше мән беріп, тұлғаларды көркем бейнелеген. Ондағы бояулардың түсі ғана емес, шынайылығы да көз тартады.
Сондай-ақ іс-шара аясында көрнекті әнші, Мемлекеттік сыйлықтың лауреаты Қайрат Байбосынов көрмеге ұсынылған таланттар өмірінен мазмұнды әңгіме айтып, суретшінің еңбегіне жоғары баға берді. Басқа да сөз алған азаматтар қылқалам шеберінің шығармашылығы жайында парасатты ой өрбітті.
Көрме соңында Мұхтар Байбосын: «Өнер адамының сыншысы – халық. Өнерімді бағалап келгендеріңіз мен үшін үлкен мәртебе, зор қуаныш. Сондықтан бәріңізге де алғысымды айтамын», деп жиналғандарға ризашылығын білдірді.
Еркеназ Қордабай,
Л.Н.Гумилев атындағы Еуразия ұлттық университетінің 2-курс студенті