700 шақырымды жүгіріп өтеді
<p style="text-align: justify;">Академик Ебіней Бөкетов атындағы Қарағанды универси­тетінің оқытушылары «Ұлытауға тағзым» атты ультрамарафон ұйымдастырды. Бұл іс-шара Арқадағы жоғары білімнің қарашаңырағы саналатын оқу орнының жарты ғасырлық мерейтойына арналған.</p>
Ұлт ұясына бағыт алған ультрамарафонды Бөкетов университетіндегі дене мәдениеті және спорттық дайындық теориясы мен әдістемесі кафедрасының аға оқытушысы Бақдәулет Тілеубек бастап, 42 шақырымнан тұратын қашықтықты жүгіріп өтті.
Спорттық іс-шараны ұйымдастырушы Марат Тұрымов айтқандай, ұшқан құстың қанаты талатын қашықтыққа жүгірушілер бес топқа бөлінген екен.
– Желаяқтардың бірі 50 шақырым жүгірсе, өзгелері 42 және 30 шақырымды бағындыруға тиіс, – дейді ол.
Ал Тұрымовтың өзі 21 шақырымды құрайтын қашықтыққа жүгіруге тәуекел етіпті.
Жалпы, ультрамарафоншылар екі күн ішінде Қарағанды – Ұлытау бағыты бойынша 700 шақырымның басын қайыруды жоспарлап отыр.
Аталған іс-шараны ұйымдастырушылар желаяқтардың бұл жорығын жаңадан құрылған Ұлытау облысына көрсетілген құрметтің бір парасы екенін де айтады.
Қарағанды облысы