Электронды бақташының ерекшелігі
<p style="text-align: justify;">Цифрлы технологияны ауыл шаруашылығы саласына да енгізуге болады. Бұл әдісті Құрманғазы ауданындағы «Қараша» шаруа қожалығы қолға алды. Қазір аталған шаруашылықта өріске шыққан мүйізді ірі қара электронды бақташымен бақыланады.</p>
Шаруа қожалығы Асан ауылдық округінде тіркелген. Қожалық жетекшісі Мәнсия Әбілхайырованың айтуынша, «электронды бақташы» құрылғысын іске қосу үшін Германиядан төрт шағын электр стансасын сатып алған. Әр станса күн көзінен қуат алады.
– Біздің қожалықта 400-ден астам мүйізді ірі қара бар. Мақсатымыз – тұрғындарды сапалы өніммен қамту. Иелігіміздегі 12 шақырымдық жайылымды электр желісіне қосылған сыммен бірге тартылған жіппен қоршадық. Бұл жобаның өзіндік ерекшелігі бар. Біріншіден, малымызды ұрыдан, екіншіден, ит-құстан қорғауға мүмкіндік алып отырмыз. Арнайы мамандарымыз «электронды бақташының» үздіксіз жұмыс істеуін үнемі бақылайды, – дейді М.Әбілхайырова.
Атырау облысы