«Барысқа» жаңа ойыншы келді
<p style="text-align: justify;">Құрлықтық хоккей лигасында (ҚХЛ) өнер көрсететін елорданың «Барысы» маусымаралық үзілісте қатарын тағы бір легионермен толықтырды. </p>
Атап айтар болсақ, америкалық шабуылшы Энтони Луис ҚХЛ-дің алдағы маусымында елордалық клуб сапында өнер көрсететін болды. 27 жастағы хоккейші Солтүстік Американың түрлі лигаларында өнер көрсетіп, АҚШ-тың жасөспірімдер мен жастар құрамаларына шақырту алған. 18 жасында «Чикаго» командасының ойыншысы атанған ол кейінгі алты жылын Америка хоккей лигасында (АХЛ) өткізген. Ал былтырғы маусымда «Далластың» фарм-клубында өнер көрсетіп, тұрақты чемпионаттың 66 матчында 55 (24+31) ұпай жинаған.
Сондай-ақ елордалық клуб қазақстандық Батырлан Мұратов және Михаил Рахмановпен сынама келісімшарт жасағанын мәлімдеді. Келісімшарт 2022 жылдың 31 тамызына дейін жарамды. Екі хоккейші де әр жылдары «Барыс» сапында ойнаған.