Атырау және Қызылорда қалалары сумен толық қамтылды
<p style="text-align: justify;">Өткен жылы 18,4 млн адам сумен жабдықтау қызметтерімен қамтамасыз етілді. Бұл туралы Индустрия және инфрақұрылымдық даму министрі Қайырбек Өскенбаев Үкімет отырысында айтты, деп хабарлайды <a href="/" target="_blank" rel="noopener noreferrer">Egemen.kz</a>.</p>
Оның айтуынша, министрлік «Қуатты өңірлер – ел дамуының драйвері» ұлттық жобасының шеңберінде 4 негізгі міндет бойынша 14 көрсеткішке, 88 іс-шараны іске асыруға жауапты.
«Өткен жылдың қорытындысы бойынша, сумен жабдықтау қызметтерімен 18,4 млн адам қамтамасыз етілді. Бұл межеленген саннан артық. Атырау және Қызылорда қалалары сумен 100% қамтамасыз етілді. Қалаларда сарқынды суларды тазарту деңгейі жоспарланған 74,9%-дан 75,7%-ды құрады», деді Қ. Өскенбаев Үкіметтің бүгінгі отырысында.
Үйге ортақ жылу және су есептегіш құралдарымен қамтамасыз ету деңгейі, сондай-ақ тұрғын үйді пайдалануға беру бойынша жоспарлы көрсеткіштер де толық орындалған.
«Республикалық және жергілікті маңызы бар автомобиль жолдарының нормативті жай-күйдегі үлесі тиісінше 90% және 80%-ды құрады. Бұл ретте Маңғыстау және Жамбыл облыстарында жергілікті маңызы бар автомобиль жолдарының үлесі оң нәтижеге жетіп, 95%-ды құрайтынын атап өту қажет. Алайда пайдалану мерзімі 25 жылдан асқан жолаушылар вагондарының үлесі жоспарлы 42,7%-дан 40,9%-ға дейін, техникалық флоттың тозуы 68%-ға дейін төмендеді», деді министр.