Алуан ауруды анықтайтын аппарат
<p style="text-align: justify;">Атырау облыстық ауруханасында алуан түрлі ауруды анық­тай­тын FibroScan аппараты іске қосылды. Енді бұл аппаратпен бауырдың зақымдануын, цирроз бен онкологиялық аурудың белгісін анықтауға жол ашылып отыр. Жаңа аппаратты «Теңізшевройл» ЖШС демеушілік көмекпен алып берді.</p>
Облыстық аурухананың функциональды диагностика дәрігері Алтынай Нұрышеваның айтуынша, осындағы гепотологиялық орталықта мұндай аппарат алғаш рет 2013 жылы алынған. Ал жаңа аппаратпен енді балалардағы сырқатты анықтауға мүмкіндік жасалып отыр.
– ҒibroScan – бауырдың зақымдану деңгейін дұрыс бағалауға, болжауға, ағзадағы созылмалы диффуздық аурулардың динамикасына, яғни гепатиттің өршуі мен оның циррозға ауысуына бақылау жүргізетін аппарат. Жаңа аппаратпен бауырдағы онкологиялық аурудың ошағы да анықталады, – дейді Алтынай Нұрышева.
Оның айтуынша, ауру белгілерін анықтау еш жарақатсыз әрі қауіпсіз жүргізіледі. Науқасқа зерттеу жүргізудің кері әсері жоқ. Пациентті алдын ала тексеру, дайындау, стационарға жатқызу қажет емес.
– Жергілікті дәрігердің жолдамасымен келген әр адам жаңа аппараттан тексеруден өте алады. Тексеру 10-15 минутқа созылады. Оның нәтижесі пациентке бірден беріледі. Ал бауырды фибросканерлеу бірнеше рет жүргізілуі мүмкін. Мұндай тексерудің диспансерлік бақылау мен терапияның тиімділігін қадағалау кезінде маңызы зор, – дейді А.Нұрышева.
Атырау облысы