Алтын белбеу үшін таласады
<p style="text-align: justify;">21 тамызда Нұр-Сұлтанда аралас жекпе-жектен Eagle FC турнирі өтеді. Бұл жарысты тамашалау үшін осы промоушеннің қожайыны, әйгілі спортшы Хабиб Нурмагомедовтің өзі келеді деп күтілуде.</p>
Кезінде айқас алаңында ешкімнен жеңілмеген күйі үлкен спортпен қош айтысқан UFC чемпионы Нурмагомедовтің мұрындық болуымен Қазақстанда үшінші рет осындай дүбірлі дода ұйымдастырылып отыр. Алғашқы жарыс Алматыда өтсе, екіншісін Ақтау қаласы қабылдады. Міне, ендігі турнирдің жалауы елорда төрінде желбірейді. Аталған жарыстың басты жекпе-жегінде 93 кило салмақтағы Дияр Нұрғожай Eagle FC промоушенінің чемпиондық белбеуі үшін таласады. Октагонда жеті кездесу өткізіп, барлығында жеңіске жеткен жерлесіміз 28 жастағы Ресей спортшысы Константин Андрейцевпен (18-14) айқасады. Егер Дияр бұл бәсекені өз пайдасына шешсе, онда ол бұл ұйымның алтын белбеуін иеленген тұңғыш қазақстандық файтер ретінде тарихта қалады.