Жас өреннің жарқылы
<p style="text-align: justify;">Жас скрипкашы Әмина Арыс­танбек World Championships of Perfoming Arts (WCOPA, Лос-Анджелес) ауқым­ды амери­калық жо­бадан жүлдемен оралды. Он жастағы өнер­­паз вокал бағыты бойынша күміс, «Аспаптық өнер» ба­ғыты бойынша қола ме­дальды иеленіп қайтты.</p>
Аталған өнер додасына 100 мемлекеттен 6 000-ға жуық талантты жастар қатысқан. Ал Әмина Арыстанбек чемпионат тарихында жасөспірімдер арасында жобаның жартылай финалына дейін жеткен тұңғыш қазақстандық өнерпаз ретінде өз өнерін жоғары деңгейде көрсете білді. Айта кетейік, өнерлі жас байқауда «Көкке өрле», «Мен – қазақ қызы» шығармаларын орындады.
Дүниежүзілік америкалық таланттар чемпионаты бұл жолы өзінің 25 жылдық мерейтойын атап өтті. Сол себепті де байқауға дәстүрлі 3 000 үміткер емес, 6 000 өнерпаз қатысқан.
«Байқауда бәсекелестік деңгейі өте жоғары болды. Қатысушылар шама-шарқы жеткенше өздерін лайықты көрсете білді. Әмина да жастығына қарамастан өзін өте байсалды ұстады», дейді балдырғанның вокал бойынша ұстазы Лейла Болатбек.
Жас талант бұған дейін де көптеген байқауда жеңімпаз атанып жүрді. Мәселен, 2019 жылы Испанияда өткен халықаралық скрипкашылар байқауында 1-орын, 2021 жылы Италияда өткен Sanremo Junior байқауында 2-орын алды.
Ал осы Америкаға сапарында өнерпаз өз әндерінің біріне бейнебаян түсіріп үлгерген. Жаңа туындыға ұзақ жылдар бойы АҚШ-та тұрып жатқан Баходыр Юлдашев режиссерлік етті. Күзде Қазақстанда аталған туындының тұсаукесерін өткізу жоспарланып отыр.