Ажалды жеңген ақын

Алдымен бүгінгі әлеумет ардақтаған арқалы ақын туралы бір ауыз сөз айта кеткеніміз жөн болар. Мұса Жәлел 1906 жылдың 2 ақпанында Орынбор губерниясының Мұстафино селосында туған. 1917-1919 жылдары бұрқ-сарқ еткен револю­­ция жас Мұсаға, оның дүниета­ны­мы­на, өмірге деген көзқара­сы­на айрықша әсер етсе керек. Сол жыл­дары әдебиет әлемінің табал­дырығын аттаған жас ақынның қаламынан туған жалынды жыр­лар уақыт өте келе татар әде­бие­тінің шоқтықты туындылары санатына енген. Ұтымдысы сол, ақын адал еңбек пен шынайы қуанышты, мөлдір махаббат пен қайтпас қайсар ерлікті жырла­ған. Оның шығармашылығында оттай ыстық Отанды сүю сезімі шүпілдеп тұр. Соғыс кезінде Отан қорғау идеясын насихат­тап, жалпы, мына өмірдегі адам­дық пен жауыздықтың, ізгілік пен тағылықтың алма-кезек астасып, тайталасып жатқан сұрапыл кө­рінісін көз алдыңа әкелетін, мөл­дір жырларын оқығанда жүрек шымырлатар әсер беретіні бар.

Ескерткіштің ашылу салтанатында облыс әкімінің орын­басары Елдос Рамазанов ел қор­ғаған есіл ердің өлмес сөзі ке­йінгі ұрпақтың рухани әле­мін байытуға септігін тигізіп жат­қанына тоқтала келіп, осы бір алтын тамырлы достықтың арқау жібі бүгін де беки түсетінін ­айтып өтті. Салтанатты сәтке әдейі кел­ген Татарстан Республикасы Премьер-Министрінің орынбасары Василь Шайхразиев, Қазақстан халқы Ассамблеясы төрағасының орын­басары Тауфик Каримов, облыстық «Вайнах» шешен-ингуш этно-мәдени қоғамының басшысы Герихан Яндиев, Көкшетау қалалық ардагерлер кеңесінің төрағасы Шияп Әлиевтер қазақ-татар жұртшылығының ежелден тілегі бір, ниеті ортақ ел еке­н­іне баса тоқталып, ұлттар мен ұлыстар арасындағы сүт­тей ұйы­ған бірліктің дәл осындай бір-бірінің асылдарын ардақтап, құрметтей білгенде ғана беки түсетінін айтып өтті. Шынын­да да, отты жырымен ортақ аспанды нұрландырып, дос­тық алып бәйтеректің тамырына аталы сөз, жалынды жырымен нәр құй­ған есіл ерлер­дің есті естелікке айнал­ған бе­дерлі бейнесінің өзі бүгінгі ұрпа­ғын тіл табысып, беріштей бекем біртұтас болуға шақырып тұрғандай емес пе?!

Ескерткіш алдында Мұса Жәлелдің жалынды жырлары оқылып, көгілдір Көкше аспанында ұлы достықтың нұр шуағы себезгілеп тұрды.

КӨКШЕТАУ