Балалар ауылындағы жылыжай
<p style="text-align: justify;">Атырауда отбасы үлгісіндегі «Ша­ңы­рақ» балалар ауылы бар. Қазір мұн­дағы алты отбасында ата-ана қам­қорлығынсыз қалған 53 бала тәр­бие­­ленеді. Олар­дың жасы – 3 бен 18-дің аралығында.</p>
«Шаңырақ» балалар ауылының директоры Гүлсара Ботатаеваның айтуынша, былтыр мұнай компаниясының демеушілігімен Жайық өзенінің жағалауынан сегіз отбасына арналған тұрғын үйлер салынған еді. Мұнда өзін өзі тану және әлеуметтік бейімдеу орталығы бар. Заманауи конференц-залда балалардың онлайн-режімде оқуына мүмкіндік жасалған. Балалар Атырау қаласындағы үш мектепке қатынап оқиды.
– Балалар бос уақытын текке өткізбейді. Он жыл бұрын қоян өсіруді қолға алған едік. Қазір 12 қоян, 6 тауық пен 18 балапан асырап отырмыз. Демеушілік көмек арқылы 2014 жылы тігін шеберханасында қыздар сахналық қойылымдарға, өзге де іс-шараларға арналған киімдерді өздері тігеді. Сұлулық салоны бар. Енді алдағы уақытта ұлдарға арналған ағаш өңдеу шеберханасы ашылады. Қазір үш станок сатып алдық, – дейді Гүлсара Ботатаева.
Жақында мұнда жылыжай ашылды. Оның құрылысына облыстық іскер әйелдер кеңесі ұйытқы болған. Кеңес жетекшісі Гүлжан Мұхатаеваның айтуынша, жылыжай құрылысына 2 млн теңге жұмсалған.
– Бұл жылыжай биылғы Балалар жылына орай қолға алынды. Құрылысы маусым айында басталды. Жылыжайдың аумағы 50 шаршы метрді құрайды. Жылыжай ашудағы мақсатымыз – отбасы үлгісіндегі балалар ауылының тәрбиеленушілерін еңбекке баулуға ықпал ету. Сол себептен балалармен бірге көкөністердің көшетін егуге келдік, – дейді Гүлжан Мұхатаева.
Атырау облысы