Геологиялық музей ашылады
<p style="text-align: justify;">Павлодар география үйі қоғамдық бірлестігінің белсен­ділері болашақ геологиялық музейге жәдігерлер жинау мақсатында өңірде жүргізген арнайы экспедициясын аяқтап қалды. Алдағы уақытта жүздеген минералдар, тау жыныстары мен өзге де пайдалы қазбалардың үлгілерін музейден тамашалауға болады.</p>
Жалпы, бұл жоба ERG (Еуразиялық Топ) құрамындағы «Қазхром» ТҰК» АҚ Ақсу ферроқорытпа зауыты мен «Павлодар» ӘКК» АҚ қолдауымен жүзеге асып отырғанын айтып өтейік. Қоғам белсенділері қазіргі уақытта жиналған үлгілерді жүйелеуге кірісті. Геологиялық музей Ертістің Павлодар өңірінің табиғи байлығын көпшілікке насихаттап, аймақтың шикізаттық әлеуетін паш етпек. Бұл арқылы өңір тұрғындары мен сырттан келетін қонақтар өлкеміз туралы танымын кеңейтіп, көпшіліктің экологиялық мәдениетін арттырады деп күтілуде.
– Музейге қойылатын үлгілерді 2014 жылдан жинай бастаған едік. Осы уақыт ішінде әлемнің әр түкпірінен 150-ге жуық жәдігерді жинап үлгердік. Одан соң біздің өңір туралы толыққанды экспозиция ұйымдастыруды мақсат еттік. Павлодар облысында қосымша экспедиция жүргізу керек болды. Ақсу ферроқорытпа зауыты біздің бастамамызды қолдады, – деп атап өтті география үйінің директоры Александр Вервекин.
Бірлестік мүшелері жоспарланған он экспедицияның тоғызын өткізді. Аймақтың түрлі кен орындары зерттеліп, халцедон псевдосталактиттері, кальциттер, кварциттер, дала шпаттары, мүйізалдамыш, мыс көгі, везувиан-пироксениттік родингиттер, ағаш және мүк опалдары, друза және кварц кристалдары жиналды. Май ауданындағы «Қалмаққырылғанның» гранитті алқаптарынан раухтопаз бен флюориттің хрусталь тәрізді өзегінің жарқын және қызықты үлгілері табылды. Арасында лампрофир-порфирит және долерит те бар. Осылайша, болашақ музей жәдігерлерінің жалпы саны қазірде үш жүзден асып отыр.
Жаңа музей алдағы қараша айында ашылады деп күтілуде. Айтып өтейік, география үйінде бұған дейін этнографиялық музей, қоғамдық географиялық кітапхана және «Жұрбай» жас өлкетанушылар клубы құрылған.
Павлодар облысы