Көліктер QR-код тағады
<p style="text-align: justify;">Енді қазақстандық авто­көліктердің нөмірлік белгі­ле­рінде арнайы QR-код болуға тиіс. Сол арқылы нө­­­мір­лік белгінің жалған-шы­ны тексеріледі. Бұл туралы Қазақстан стандарттау және метрология институты хабарлады.</p>
Биыл елімізде 1 қыркүйектен бастап ҚР СТ 986-2022 ұлттық стандарты қолданысқа енгізілді. Онда жалғандықтан қорғау үшін қажетті арнайы және қосымша элементтері болуға тиіс нөмірлік белгілер мен оған арналған бланкілерге қойылатын талаптар жазылған. Ішкі істер министрлігінің «Ақпараттық-өндірістік орталығы» дайындаған стандарт мемлекеттік тіркеу белгілеріндегі қаріптерге, сандарға және қорғау элементтеріне қойылатын техникалық талаптарды біріздендіруді қамтамасыз етеді.
Мамандардың айтуынша, полиция қызметкерлері нөмірлердің түпнұсқа екенін тексере алатын бірегей DMC-кодтарын қолдану қосымша қауіпсіздік элементтеріне жатқызылған. Арнайы қорғаныс элементтерін нөмірдің бетінен химиялық жолмен немесе физикалық әсер ету арқылы алып тастауға болмайды және ол нөмірде сақталуға тиіс.
Айта кетейік, мұндай арнайы стандартты енгізу өнім өндіру бағасының өзгеруіне, сондай-ақ мемлекеттік бюджеттен қосымша шығындарға әкеп соқпайды.