«Мұқағалидың» жеңісі
<p style="text-align: justify;">Болат Қалымбетов түсірген «Мұқағали» фильмі Дубайдағы Мeta Film Fest кинофестивалінде бас жүлдеге ие болды. Таяу Шығыс, Азия және Африка кино өндірісін қамтитын Meta Film Fest жаңа халықаралық кинофестиваль 27 қазанда Джумейра Пальмасындағы Nakheel Mall-дағы Vox Cinemas кинотеатрында басталған еді. Фестивальде 25 елден 70-тен астам фильм көрсетілді.</p>
Байқау бағдарламасына «Мұқағали», «Ұлы дала таңы», «Ақын» және «Конокрады» атты төрт қазақстандық фильм таңдалған болатын. Мұқағали Мақатаевтың 90 жылдығына арналған «Мұқағали» кинокартинасы ақын өмірінің соңғы жылдары туралы баяндайды. Фильмді Мәдениет және спорт министрлігінің тапсырысы бойынша Ш.Айманов атындағы «Қазақфильм» киностудиясы түсірді.
Айта кетейік, киноның сценарийін жазушы Жүсіпбек Қорғасбек режиссер Болат Қалымбетов пен Ғазиз Насыров бірлесіп жазды. Фильм қазақстандық прокатқа 2021 жылдың 21 қазанында шыққан болатын. Ал әлемдік премьерасы 25-ші (PÖFF) Таллин кинофестивалі аясында өтті. Онда қазақстандық картина экуменикалық қазылар алқасының жүлдесіне ие болды. Биыл наурыз айында өмірбаяндық картина Кераладағы (Үндістан) 26-шы Халықаралық кинофестивальдің «Әлемдік кино» секциясында ұсынылды. Одан бөлек жуырда «Мұқағали» фильмі Қазан кинофестивалінде қазылар алқасының арнайы жүлдесін жеңіп алды. Сондай-ақ фильм Гатчинадегі (Ресей) «Әдебиет және кино» Халықаралық кинофестивалінде қоюшы-суретші Ермек Өтегеновтің үздік жұмысы үшін қазылар алқасының арнайы дипломына ие болған еді.