Қазандықтан ақау шықты

Қыс қыр астында. 5 қара­ша күні кешкі сағат 20:00-де жылу қазандығының күл шы­ғару жүйесіндегі стансада сорғы істен шығып, №1 қазандық агрегатының қосалқы жабдығы апатты жағдайда ажыратылды. Нәтижесінде, салқындатқыштың тем­пературасы +39°С дейін тө­мен­­деп кеткен. Айта кетсек, қа­лыпты температура мөл­ше­рі +70°С еді. Орын ал­ған ол­қылыққа байланыс­ты шұ­ғыл түрде штаб құрылып, ма­ман­дар мәселені шешу жолын қарастырып жатыр.

– Шұғыл түрде менің басшы­лы­ғыммен апатты жою жөніндегі штаб құрылды. Штаб тәулік бойы жұмыс істейді. Сондай-ақ жылу стансасына Согра және Өскемен ЖЭО, «Өскемен жылу желілері» АҚ мамандары келді. Қа­зіргі уақытта күл шығару жүйе­сін­де қозғалтқышты ауыс­ты­ру, іске қосу-реттеу жұ­мыс­тары жүргізілуде. ЖЭО-ға қо­сымша 120 тонна мазут жет­кізілді, отынды жөнелту жал­ға­суда, – дейді аймақ басшысы Даниал Ахметов.

Сонымен қатар апатты жағ­дай­ды жою үшін «Қазақмыс» ЖШС ЖЭО-ға 20-дан аса қыз­меткер жіберіп, жөндеу, қалпына келтіру жұмыстарына қосымша жабдықтар бөлді. Одан бөлек көмек ретінде Өскеменнің «Вос­ток­взрывпром» ЖШС-ның 20 қыз­­меткері келді. Қаланың энер­го­­жүйе­сінің үздіксіз жұмыс істеуі үшін «Біріккен Энерго­Сер­­вистік Компаниясы» АҚ Рид­дерге 12 апаттық бригада жі­берді. Риддер қаласының білім бөлімі басшылығының бұй­рығымен 7-11 қарашадан бастап мектеп оқушылары қа­шық­тықтан оқыту формасына көшті. Қаланың мек­тепке дейінгі мекемелері де уа­қыт­ша жұмысын тоқтатты.

– Білім ғимаратында жылу әлі тарқай қойған жоқ. Бірақ оқушыларды қашықтан оқуға жібердік. Оқу орнында онлайн оқыту платформасы жұмыс істеп тұр. Шаруашылық қызмет­кер­лері күшейтілген режімде жағдайды қадағалап отыр. Қа­лада жағдайға байланысты штаб құрылыпты. Білімді, білікті мамандар келіп, ақауларды ретке келтіріп жатыр деген хабарды естіп отырмыз. Іскерлік танытса, мәселе оңынан шешіледі, – деп сенім білдірді Риддер агротехника колледжінің директоры Сұңқар Асқарұлы.

Ресми ақпаратқа сенсек, «Та­би­ғи және техногендік сипат­тағы төтенше жағдайлардың сынып­тамасын белгілеу тура­лы» Үкіметтің 2014 жылғы 2 шілдедегі №756 қаулысына сәй­кес бұл апат­тық жағдай жер­­­гілікті ауқым­дағы тө­тенше жағдай деп жікте­ле­ді. Облыс бас­шылығының мәлі­метін­ше, жағдай ерекше бақы­лау­да. Риддер қаласын жылумен жаб­дықтауды қалпына келтіру бо­йынша барлық қажетті шаралар қабылданып жатыр екен. Ал тұрғындар бұл қазандықтың Кеңес үкіметі тарқағалы күр­делі жөндеу көрмегенін айтады.

– Екінші күннен асты, үй суып кетті. Жылы су жоқ. Үйді электр энергиясымен жылытып отырмыз. Электр энергия­сын көп пайдаланғандықтан, энер­гия компаниясынан да ақау шығуы мүмкін. Мектеп пен бала­бақша жабылды. Яғни бала үйде, ата-ана жұмыста. Өрт шығып, қайғылы жағдай болмаса екен. Қауіпті. Ата-ана­ның бірі жалақысын сақтай отырып, балаларға қарау керек. Оның үстіне ел тұмауратып ауырып жатыр. Тағы бір айта кетерлігі, әкімнің ауызша бұй­ры­ғымен бала­бақшалар, мектептер алдын ала жыл соңына дейін жы­лу­ға төлеп тастаған. Алмаған қыз­мет үшін қалай ғана алдын ала ақша төлеген?! Түсініксіз. Жалпы, Риддер қа­­зандығының 98 пайызын жөн­­деу керек деп мамырда айтылған. Бұл қазандық Ке­ңес үкіметі тарағалы күрделі жөндеу көрмеген. Алай­да біз­дің басшылық қыруар қар­жы жұмсап, орталық алаңды жөндеді. Ешкімге қажеті жоқ тоғайдың арасына жа­рық тартты. Бюджеттің қаржы­сын мақ­сатсыз жұмсап жатыр деген осы. Суықта дірдектеп отыр­ға­нымыз – жемқорлықтың, өтірік цифрдің, өтірік есептің арқасы, – дейді Риддер қаласының тұрғыны Назар Асаинов.

Иә, айтса айтқандай-ақ. «Қой­­­шы­ның қызы қой келгенде іс тігеді» демекші, біз­дің жақта қара күзде жол жөн­деу жұмыстары басталады, құ­бырлары ауысады, жылу қа­зан­дықтары да қыс келгенде істен шығады. Қыс қамын жаз ойлап қоюға болар еді ғой. Білеміз, айтуға оңай. Дей­тұр­ған­мен, жа­уап­кершілік сезіне бер­мейміз кейде. Оның үстіне Рид­дердегі дәл осы мәселе төрт-бес жылдан бері кө­те­рі­ліп келе жатқан көрінеді.

Шығыс Қазақстан облысы,

Риддер қаласы