Қыздардың көрсеткіші керемет
<p style="text-align: justify;">Бұл күндері АҚШ-тың Нью-Йорк қала­­сында күрес түрлерінен Билл Фар­релл мемориалы өтіп жатыр. Атал­ған жарыста әлемнің 18 мемлекетінен келген балуандар бақ сынауда.</p>
Боз кілемге алғашқы болып әйелдер күресінің өкілдері шықты. Бұл бәсекелерде Қазақ елі намысын төрт спортшымыз қорғады. Бір кереметі, олардың барлығы да жеңіс тұғырына көтерілді. Атап айтсақ, Мәдина (68 кило) мен Жәмила Бақбергеновалар (72 кило) алтыннан алқа тақты. Биыл көктемде бұл балуандардың екеуі де Азия чемпионатында бас жүлдені олжалап, барша қазақ жанкүйерін қуантқан еді. Одан бөлек, Жәмиланың әлем чемпионатының екі дүркін күміс және Ислам ынтымақтастығы ойындарының қола жүлдегері деген атақтары бар. Биылғы маусымның қорытындысында ол өз салмақ дәрежесінде дүниежүзілік рейтингте көш бастады. Ал Марина Седнева (55 кило) күміс медальды иеленсе, Алтын Шағаева (53 кило) қола жүлдені қоржынға салды.
Енді біз еркін күрес шеберлерінің белдесулерін тамашалаймыз. Бұл жарыста Қазақстанның 17 балуаны күш сынасады.