Кішкентай құтқарушы
<p style="text-align: justify;">Қауіптің қайдан, қашан тап боларын кім білген? Атырауда екі жасөспірім Жайық өзенінде қатқан мұздың үстіне шыққан. Сол кезде жұқа мұз ойылып, екеуі де суға түсіп кеткен. Оқыс оқиға 3 желтоқсан күні болған.</p>
Ал оларды құтқаруға қол ұшын созған кім? Бір таңданарлығы, ересектер емес, сол маңда ойнап жүрген 8 жасар Дінмұхаммед Жаңбырбай суға батқан замандастарын құтқаруға бірінші болып ұмтылған. Сөйтіп, ол өзінен үлкен екі жасөспірімнің бірін қолынан тартып, судан шығаруға көмектескен. Судан шыққан жасөспірімнің бірі екіншісін құтқарып қалған. Кейін суға батқан екі жасөспірімнің бірі 14, екіншісі 9 жаста екені анықталды.
Оқиға орнына жеткен полиция қызметкерлері балаларға алғашқы көмек көрсетіп, жасөспірімдерге де, олардың ата-аналарына да мұз үстінде жүрудің қауіпті екенін түсіндірді.
– Баламды ажалдан құтқаруға көмек берген Дінмұхаммедке әрекеті мен жанашырлығы үшін алғысымды айтуды жөн көрдім. Ол қорқып қашып кетпей, батыл әрекет етті. Қиналған жанға көмегін берген батыл баланың ата-анасына да ризашылығымды білдіремін, – дейді 9 жасар жасөспірімнің анасы.
Облыстық төтенше жағдайлар департаментінің қоғаммен байланыс тобы Жайық өзеніндегі мұздың әлі де қауіпті екенін ескертіп отыр. Өзен жағалауында мұздың қалыңдығы – 3-5 см. Ал өзеннің орта тұсында мұз әлі қатпаған.
Атырау облысы