Спорт саласының үздіктері анықталды

Салтанатты кеш барысында министрлік тарих қойнауына еніп бара жатқан 2022 жылды қорытындылап, халықаралық ареналарда Әнұранымызды шырқатып, Көк туымызды көкте желбіреткен спортшыларды марапаттады. Сондай-ақ олардың бапкерлері мен спорттың сан түрлі саласында Қазақ спортының өркендеуіне өз үлесін қосып жүрген жандар да сыйлықтан құралақан қалған жоқ. Сонымен қатар Мәдениет және спорт минис­тр­ілігі спортшылардың айту­лы жеңісін БАҚ арқылы насихаттап жүрген спорт журналистерін де назардан тыс қалдырған жоқ.

Сонымен, іс-шараның қо­ры­тындысы бойынша әйел­дер күресінен екі дүркін Азия чемпионы, әлем біріншілігінің күміс жүлдегері Жәмила Бақ­бергенова (жазғы спорт түр­лерінен) мен Бейжің Паралим­пиадасының қола медаль иегері Александр Герлиц (қысқы спорт түрлерінен) «Жылдың үздік спортшысы» атанса, олардың жеке бапкерлері Нұрсұлтан Теміров (жазғы) пен Антон Жданович (қысқы) «Жылдың үздік жаттықтырушысы» аталымына ие болды. Сондай-ақ Ұлттық коньки тебушілер фе­дерациясы – «Жылдың үз­дік аккредиттелген спорт феде­рациясы», Атырау облысы «Мүгедектердің спорт ұйы­мы» – «Жылдың үздік спорт мекемесі», Қарағанды об­лысының Дене шынықтыру және спорт басқармасы – «Жылдың үздік спорт өңірі», Дастан Балабеков – «Ауылдағы үздік жаттықтырушы», Ирина Новикова мен Елена Галиц – «Дене шынықтыру және спорт бөлімінің үздік маманы», Самат Сапишев – «Жылдың үздік балалар жаттықтырушысы», «Қуа­ныш» волейбол клубы – «Ойын түрлері бойынша үздік спорт командасы», Бекжан Адамбеков – «Ауылдағы үздік дене шынықтыру және спорт бөлімінің әдіскері», Елена Ры­бакина – «Жыл жаңалығы», Қайырбек Хамзин – «Жылдың үздік меценаты» және Алан Құрманғалиев (үстел теннисі), Евгений Федоров (велоспорт), Мария Бровкова (каноэде ескек есу) – «Жастар мен жас­өспірімдер арасындағы үздік спортшы» деп танылды.

Ал жылдың ең үздік спорт журналисіне берілетін «Сейдахмет Бердіқұлов атында­ғы үздік спорт журналисі» ата­лымы бойынша «Egemen Qazaqstan» тілшісі Ғалым Сүлей­мен үздік шықты. Сон­дай-ақ Аслан Қаженов (Үздік те­ле­визиялық репортаж) пен Бек Төлеуов (Үздік жарияланым) те жүлдегерлер қатарынан көрінді.

Айта кетейік, жеңімпаздар Мәдениет және спорт министр­лігі тарапынан бір миллион тең­ге көлемінде қаржылай сыйақымен марапатталды.