Күйзелгенге көмектесетін 3580 call-орталығы
<p style="text-align: justify;">Адамдар қиын жағдай­ларға тап болып торық­қанда түрлі қателікке ұрынып, тіпті өз өзіне қол салуға дейін бараты­нын, бірақ тікелей пси­хиа­триялық көмек көрсе­тетін медициналық мекемелерге қаралуға жұрт­тың қауесетінен қаймы­ғатынын айтып жатады. Ендігі жерде күйзеліске түскендерге қолұшын со­за­тын call-орталықтары бір айдан бері Алматы, Тараз және Семей қала­ларында жұмысын бас­тады.</p>
Егер күйзеліс қажытып, дегбіріңіз қашып, өмірден баз кешіп жүрсеңіз, 3580 нөміріне жедел хабарласуға болады. Елімізде психологиялық көмекке мұқтаж тұрғындар үшін тиімді ақпараттық қызмет көрсетуге ұмтылған 3580 call-орталығы іске қосылды. Бұл жоба «Қазақстан Республикасында психикалық денсаулықты сақтаудың бірыңғай ақпараттық қызметін пилоттау» деп аталады. 23 желтоқсаннан бастап жұмысқа кірісті.
Алматы қаласы, Жамбыл және Абай облыстарының Психикалық денсаулық орталықтары мен осы үш өңірдің Жастар медициналық орталықтарының қызметтері бірыңғай ақпараттық жүйеге біріктіріліп, халыққа психикалық денсаулық саласы бойынша ақпараттық қызмет көрсетіп жатыр.
– Осы бастама арқылы 25 маман Республикалық психикалық денсаулық ғылыми-практикалық орталығында «қашықтан психологиялық кеңес берудің теориялық және практикалық негіздері» бойынша білім алып, кәсіби білімін жетілдіретін тренингтерде шыңдалды. Бұған қоса сұрақ-жауап бойынша мамандарға арналған білім базасы әзірленді. Жоба Республикалық психикалық денсаулық ғылыми-практикалық орталығы, Ұлттық қоғамдық денсаулық сақтау орталығы және Дүниежүзілік денсаулық сақтау ұйымының Қазақстандағы елдік кеңсесінің техникалық қолдауымен дүниеге келді. Әрбір ұйым ДДҰ Еуропалық өңірлік бюросымен компьютерлік техниканы өтеусіз туралы келісімге қол қойды. Жұмыс орындарын құрал-жабдықпен жабдықтау мәселесі шешілді. Бұл – тұрғындардың психикалық денсаулық бойынша ақпаратты жедел және сапалы мағлұматпен қамтамасыз ету мақсатында ашылған бірыңғай орталық. Әрбір қоңырау шалған адамның мәліметтері құпия сақталады. Сондықтан қиналғанда 3580 нөміріне хабарласып, психологиялық көмекке жүгініңіздер, – дейді Республикалық психикалық денсаулық ғылыми-практикалық орталығының бас директоры Қуаныш Алтынбеков.
Аталған жоба халықтың психикалық денсаулық сақтау саласы бойынша қызметке қолжетімділігін арттырып, ақпараттандыруды да көздейді. Әрі Республикалық психикалық денсаулық ғылыми-практикалық орталығының сайтында қашықтан психологиялық көмек көрсету тетіктері әзірленіп жатыр. Сонымен қатар қанатқақты жоба аяқталғаннан кейін оның қызметіне талдау жасау арқылы қызметін дамытып, осы жылы еліміздің барлық өңірінде бірыңғай ақпараттық қызметін ашу жоспарланып отыр.
АЛМАТЫ