Үйді онлайн рәсімде
<p style="text-align: justify;">«Азаматтарға арналған үкімет» мем­лекеттік корпорациясы цифр­лық серіктестерімен бірлесіп, Digital Almaty 2023 форумында жаңа блок­чейн-өнімін таныс­тыр­ды. Енді қазақ­стандықтар Ха­лық­қа қызмет көрсету орта­лық­­тары мен нотариусқа жүгін­бей-ақ, жылжымайтын мүлікті он­­лайн платформада сатып ала алады.</p>
Blockchain технологиясы арқылы барлық қолданушының жеке ақпаратының қауіпсіздігі қамтамасыз етіледі. Аталған жобаның нәтижесінде азаматтар өз уақытын үнемдеп, 8 сағаттың ішінде құжаттарды рәсімдеп, 10 минут ішінде үйді тіркей алады. Сонымен қатар бұл қызметтің құны нотариус қызметтерінен әлдеқайда арзан болады. Сондай-ақ азаматтар жылжымайтын мүлік нысанының орналасқан жеріне қарамастан, мемлекеттік құжаттарды онлайн тіркей алады.
Мәмілені рәсімдеген азаматтар мен сатып алынатын нысанның барлық ақпаратын «Жылжымайтын мүлік тіркелімі» мемлекеттік деректер қоры тексереді. Сатып алу-сату шартына электронды цифрлық қолтаңба арқылы қол қоюға болады. Бұл мәміленің қауіпсіздігі мен ашықтығын қамтамасыз етеді.
– Біз Freedom Bank-пен бірлесіп, жеке тұлғалар арасындағы сатып алу-сату шартын ресімдеуге арналған онлайн платформаны әзірледік. Жаңа платформа алдағы айда іске қосылады. Бұл жүйеге BI Group құрылыс компаниясы қатысады. Біз ақпараттық қауіпсіздікті қамтамасыз ету мақсатында тіркеуші органдар нотариустардың қызметіне жүгінбестен, тараптардың ерік білдіруін онлайн режімде тексеруге мүмкіндік беретін биометриялық жүйені енгіздік. Қол қойылғаннан кейін жаңа меншік иесінің құқықтары «Жылжымайтын мүлік тіркелімі» мемлекеттік деректер қорында тіркеледі, – дейді мемлекеттік корпорацияның басқарма төрағасы Сүйеніш Әбділдин.
Freedom Bank директорлар кеңесі төрағасының кеңесшісі Айдос Жұмағұловтың айтуынша, банк 2021 жылы тұрғын үйді ипотекаға алудың жүйесін 90 пайызға цифрландырды. Бірақ мәмілені жасасудың соңғы кезеңі – нотариуста шартқа қол қою жүйесі әзірленбеген болатын.
– Мемлекеттік сервистермен интеграциялау және мемлекеттік корпорациямен құрылған ынтымақтастықтың нәтижесінде біз құжаттарды 100 пайыз онлайн-ресімдеуге мүмкіндік беретін блокчейн-платформасын құрдық. Осы платформаның көмегімен жеке тұлғалар жылжымайтын мүлікті биометрия мен бейнесәйкестендіруден өткеннен кейін, электрондық форматта ашық және қауіпсіз мәмілелер жасай алады, – дейді ол.
Бұрын бұл жүйе тек B2C форматында қолжетімді болса, қазір С2С форматында, яғни делдалдарсыз жеке тұлғалар арасында тікелей сатуға мүмкіндік беретін жүйеге ауысты.