«Байтақ» құжаты талапқа сай

Жиынға «Байтақ» жасылдар пар­тиясының өкілдері, облыс­тар­дың, Астана, Алматы және Шымкент қалаларының аумақтық сайлау комиссиялары бейнеконференция режімінде қосылды және бұқаралық ақпа­рат құралдарының өкілдері қатысты. Сондай-ақ Бас прокуратура, Әділет, Ішкі істер, Қар­жы министрліктерінің жауап­ты лауазымды тұлғалары, Еуро­падағы қауіпсіздік және ын­ты­мақтастық ұйымының Де­мо­кра­тиялық институттар және адам құ­қықтары бюро­сы­ның сайлау­ды байқау мис­сия­сының өкілі ша­қы­рыл­ды.

Орталық сайлау комис­сия­сы­ның төрағасы Нұрлан Әбдіров елі­міз­де тіркелген 7 саяси партия­ның барлығы партиялық тізімдер бойынша Парламент Мәжілісі депу­тат­тарының сайлауына қаты­су­ға жіберілгенін атап өтті. Сондай-ақ ол 7 ақпанда ОСК-ға Парламент Мәжілісі депутаттарын сайлауға партиялық тізімді ұсыну туралы «Байтақ» жасылдар партиясының құжат­тары тапсырылғанын еске салды. Орталық сайлау комис­сиясы сайлау заңнамасына сәй­кес кандидаттардың Кон­сти­­туция және Сайлау туралы Консти­ту­циялық заңмен қо­йы­­латын талап­тар­ға сәйкес­тігін анықтау бойынша тиісті рәсімдер жүргізді.

Орталық сайлау комис­сия­сының мүшесі Сәбила Мұстафина «Қазақстан Респуб­ли­ка­сындағы сайлау туралы» Конституциялық заңның 89-бабына сәйкес тіркеуге бір саяси партиядан бір ғана тізім жіберілетінін, оған саяси партиялар арасында бөлінетін де­пу­тат­тық мандаттардың бел­гі­ленген санының 30 пайыздан аспайтын адамдар саны енгізілгенін хабарлады. Пар­тия­лық тізімде әйелдер, жастар және мүгедектігі бар адамдар саны жиынтық бо­йынша оған енгізілген адам­дар­дың жалпы санының кемінде 30 па­йы­зын құрауға тиіс. Белгілі болғандай, «Байтақ» жасылдар партиясының 18 адамнан тұра­тын партиялық тізімді ұсын­ған. Тізімдегі 6 кандидат әйелдер, жас­тар және мүгедектігі бар адамдар санатқа жатады, яғни талапқа сәйкес 38,9 пайызды құрайды. Пар­тиялық тізімге енгі­зілген бар­лық адам Конституция мен сайлау туралы Конституциялық заң­ның талаптарына сәйкес келе­ді. Сәбила Мұстафина пар­тия­лық тізімдерді ұсынған сая­си партиялар партиялық тізім­ге енгізілген әрбір адам үшін заңнамада белгіленген ең тө­менгі жалақының он бес есе­ленген мөлшерінде Орталық сайлау комиссиясының шотына сайлау жарнасын енгізетінін хабарлады. Парламент Мәжілісі депутаттарының алдыңғы сайлауында дауыс беруге қатысқан сайлаушылардың 5 және одан да көп пайызын алған саяси партиялар сайлау жарнасын төлемейді. 2021 жылғы қаң­тар­да өткен Парламент Мәжі­лісі депутаттарының сайлауы­­­на «Байтақ» жасылдар партиясы қа­тыс­қан жоқ. Осыған байланыс­ты аталған партия 18 млн 900 мың теңге сайлау жарнасын төледі.

Комиссия мүшелері сәй­кес­тік­ті анықтау және тіркеу туралы тиісті хаттамаларға қол қой­ған­нан кейін «2023 жылғы 19 наурызға тағайындалған Пар­ламент Мәжілісі депутат­та­рының кезектен тыс сайлауында «Байтақ» жасылдар пар­тия­сы­ның қоғамдық бірлес­ті­гі­нің партиялық тізімін тіркеу туралы» қаулы қабылдады. Тір­келген кандидаттар тиісті куә­лік­терін алды.